د افغان سولې لپاره د امریکا ځانګړی استازی زلمی خلیلزاد د مارچ پر ۱۵ مه کابل ته رسېدلی دی.
په کابل کې د امریکا سفارت د مشال راډيو افغان څانګې ته د دې خبر تصديق کړی دی.
نوموړی په داسې حال کې کابل ته تللی چې د افغان سولې په اړه مسکو کې جوړیدونکې غونډې ته دری ورځې پاتي دی.
د افغانستان جمهوري ریاست په یوه خبرپاڼه کې لیکلي، ولسمشر محمد اشرف غني د مارچ ۱۵ مې مازدیګر په ارګ کې له ښاغلي خلیلزاد سره ملاقات کړی چې پکې خليلزاد د خپلو وروستیو سفرونو او فعالیتونو په اړه ولسمشر غني ته معلومات ورکړل او له دې سره سره دواړو د سولې بهیر د راتلونکو اقداماتو په اړه هم خبرې کړې دي.
یو شمېر رسنیو بیا ویلي، ښاغلي خلیلزاد د ملي مصالحې دعالي شورا له مشر عبدالله عبدالله سره هم لیدلي دي.
زلمي خليلزاد د افغان سولې په اړه د خپلو وروستيو سفرونو او فعاليتونو په اړه ولسمشر غني ته معلومات ورکړلجمهوري رياست
تر اوسه د دې ناستې د نورو جزیاتو په اړه معلومات نشته.
په ورته وخت کې په قطر کې د طالبانو سیاسي دفتر منلي چې په مسکو کې د افغان سولې په اړه جوړېدونکې ناستې کې به ګډون کوي.
د دې دفتر ویاند محمد نعیم رسنیو ته استول شوي پیغام کې ویلي، د ملابرادر په مشرۍ به ۱۰ کسیز پلاوی د مسکو په ناستې کې ګډون وکړي.
خو طالبانو د استنبول په غونډه کې د ګډون په اړه لا تر اوسه څه نه دي ویلي.
د طالبانو د سیاسي دفتر ویاند محمد نعیم دا هم ویلي، د مارچ پر ۱۴ مه په قطر کې د زلمي خلیل زاد په مشرۍ د امریکايي پلاوي، د ملا برادر په مشرۍ د طالب ډلې، د قطر د لومړي وزیر د مرستیال او بهرنیو چارو وزیر تر منځ یو درې اړخیزه غونډه هم شوې چې پکې د دوحې د هوکړې پر عملي کولو، د افغانستان پر وضیعت او د بین الافغاني خبرو د دوام په اړه خبرې وشوې.
د ملابرادر په مشرۍ ۱۰ کسیز طالب پلاوی به د مسکو په ناستې کې ګډون کويمحمد نعيم
طالبان داسې مهال د مسکو په غونډه کې خپل ګډون اعلانوي چې افغان حکومت هم منلي چې د افغان سولې په اړه د مسکو او ترکیې په ناستو کې ګډون کوي خو لا تراوسه یې خپل پلاوی نه دی ټاکلی.
د ولسمشر محمد اشرف غني د ملي امنیت سلاکار حمدالله محب د شنبې په ورځ ویلي وو چې د افغانستان د بهرنیو چارو وزارت او د مصالحې عالي شورا په دې کار کوي چې په یادو ناستو کې د ګډونوالو کچه معلومه کړې.
د مسکو ناستې د مارچ پر ۱۸ او د استنبول غونډه د مارچ پر ۲۷ نېټه جوړېږي.
