د افغانستان د لوګر ولایت په مرکز پل علم کې موټر بم برید شوی دی چې پکې لږ تر لږه ۲۴ تنه وژل شوي او ۱۱۰ نور ټپي شوي دي.
د لوګر د والي وياند ديدار لونګ نن رسنيو ته په لېږل شوې خبرپاڼه کې ويلي چې په پروني بريد کې ۲۴ کسان وژل شوي او ۱۱۰ ټپيان دي.
تر دې وړاندې د لوګر د ولایتي شورا رئیس حسیب الله ستانکزي او یو پولیس افسر حېدر احمدي مشال راډیو ته د وژل شویو شمېر ۲۷ او د ټپیانو شمېر ۶۰ یاد کړی وو.
د لوګر والي عبدالقیوم رحیمي ویلي چې د تېرې ورځې د موټر بم برید د قربانیانو غچ به واخلي.
نوموړي دا څرګندونې د مې پر لومړۍ نېټه د نائب امین الله خان لوګري په روغتون کې د تېرې ورځې د وژل شویو او ټپیانو له کورنیو سره د لیدنې پر مهال وکړې.
د لوګر د والي ویاند دیدار لونګ مشال راډیو ته وویل، چې د یادې پېښې ټول قربانیان ملکي وګړي دي، چې زیات شمېر یې د کانکور ازموینې ګډون وال وو.
دی وایي، یاد زده کوونکي ددې ولایت له لیرې پراتې ازرې ولسوالۍ څخه د ازموینې په موخه پل علم ښار ته راغلي وو.
لونګ وایي، په ټپیانو کې ۱۲ مېرمنې،۱۶ ماشومان او ۱۱ تنه نور د نائب امین الله خان ولایتي روغتون کارکوونکي او پاتې نور چاودنې سیمې ته له نږدې ځایونو روغتونونو ته ور وړل شوي دي.
د لوګر د ولایتي شورا رییس حسیب الله ستانکزي مشال راډیو ته وویل چې دا چاودنه د ولایتي شورا د پخواني رییس پر مېلمستون شوې ده.
ده وویل، "دا ځای د ولایتي شورا د پخواني رییس ډاکټر صاحب ولي وکیل مېلمستون و. هلته یوه ډاینا راځي او وايي، موږ د موسسې خلک یو، روژه ماتی راوباسئ. موټر چې دننه ننوځي، انفجار کوي، هغه کور ټول مکمل ویجاړېږي."
نوموړي زیاته کړې چې په دې موټر بم برید کې مېلمستون ته نژدې د روغتیا ریاست روغتون هم سخت زیانمن شوی دی.
د افغانستان د روغتیا وزارت په وینا د یوشمیر ټپیانو روغتیایي وضعیت ښه نه دی او په دوی کې یوشمیر د کانکور د ا زموینې زده کوونکي دي.
د افغانستان د کورنیو چارو وزارت ویاند طارق ارین رسنیو ته په لیکلي پیغام کې ویلي چې په برید کې وژل شوي او ټپي ټول عام ولسي وګړي دي او ښايي د مړو شمېر زیات شي.
تر دې وړاندې د لوګر د والي ویاند دیدار لونګ رسنیو ته وویل چې وسله والو طالبانو د اپرېل ۳۰مې په ماښام د لوګر ولايت د مرکز پل علم ښار کې ولايتي روغتون ته مخامخ پر یوه مېلمستون د موټر بم بريد وکړ.
لونګ وایي په دې مېلمستون کې به ډیری وخت د ازرې ولسوالۍ وګړي اوسېدل چې اوس مهال پکې د کانکور د ازموينې ګډونوال زده کوونکي هم مېشت و.
لونګ زیاتوي، چې موټر بم بريد د ولايتي روغتون سربېره د خلکو کورونه او ګڼ شمېر هټۍ زيانمنې کړې دي او عامو خلکو ته يې مالي او ځاني زيانونه اړولي دي.
په افغانستان کې اروپايي ټولنې په خپل ټویټر د لوګر د پېښې قربانیانو سره د خواخوږۍ په پار لیکلي چې د عامو خلکو وژل او ژوبلول د ټول هېواد لپاره یوه تراژیدي ده.
یادې ټولنې زیاته کړې چې دا ډول بې معنا بریدونه باید ژر ودریږي.
که څه هم افغان چارواکو برید د وسله والو طالبانو له خوا تر سره شوی بللی دی خو تر اوسه د دې چاودنې مسولیت چا نه دی منلی.
د طالبانو ویاند ذبیح الله مجاهد آزادۍ راډیو ته وویل چې په دې اړه د دوی څېړنې روانې دي.
له ارګ څخه په خپره شوې خبرپاڼه کې د افغان ولسمشر اشرف غني له خولې ویل شوي چې طالبانو د خلکو پر وړاندې نامشروع جنګ او تاوتریخوالي ته په دوام ورکولو سره یو وار بیا وښوده چې نه یوازې د اوسني ناورین د سوله ییز او اساسي حل اراده نه لري، بلکې د وضعیت پېچلي کولو سره د سولې برابر شوی فرصت ضایع کوي.
د افغانستان د ملي روغې جوړې د عالي شورا مشر عبدالله عبدالله د دې پیښې په اړه ویلي چې د خلکو دښمنانو د ماشومانو او ښځو په ګډون یوشمیر بیګناه انسانان په مبارکه روژه کې ووژل.
د برید په اړه نړیوال غبرګونونه
د افغانستان لپاره د اروپایي ټولنې پلاوي دا برید وغانده او په ټویټر کې یې ولیکل چې د روژې په مبارکه میاشت کې د لوګر په پل علم کې د موټر بم د برید خبر خپریږي چې پکې بیګناه عام وګړي د زده کوونکو په ګډون وژل کیږي او ټپیان کیږي.
دا برید په هغه ورځ وشو چې د افغانستان د بیا رغونې لپاره د سرمفتش یا سیګار دفتر خبر ورکړ چې د سولې د خبرو سربیره په افغانستان کې د سږکال په لومړیو درې میاشتو کې شخړې زیاتې شوې دي.
د لوګر د پېښې انځورونه
په لوګر کې موټر بم برید او د سیمې حالت
سیګار د اپرېل پر ۳۰مه په خپل رپورټ کې څرګنده کړه چې د طالبانو په څیر د یاغیانو له لورې برید د جنوري له میاشتې تر مارچ میاشتې د تیرکال همدې مودې په پرتله ۳۷ فیصده زیاتې شوې دي.
په افغانستان کې د تشدد لړۍ له هغه راهسې تونده شوې چې د امریکا ولسمشر جو بایډن او ناټو د روان کال د سېپټمبر تر ۱۱مې له افغانسان د خپلو ځواکونو د اېستلو اعلان کړی دی.
د ولسمشر جوبایډن او ناټو دې اعلان طالبان غصه کړي هغه ځکه چې د دوی او د امریکا د پخواني ولسمشر ډونلډ ټرمپ ترمنځ د شوي تړون له مخې به امریکا یو شمېر امنیتي ضمانتنو ته په کتو خپل ځواکونه د روان کال د مې میاشتې تر لومړۍ نېټې له افغانستان اېستل.
د امریکا د پخواني ولسمشر ډونلډ ترمپ او وسله والو طالبانو ترمنځ دا تړون د ۲۰۲۰م کال د فرورۍ پر ۲۹مه د قطر په پلازمېنه دوحه کې شوی وو.
