د بنو د جانیخېلو پرلتوالو تر حکومتي ډاډ وروسته د اسلام اباد په لوري د احتجاجي لاریون پلان ځنډولی دی.
د پرلت منتظم او ځايي مشر ډاکتر ګل عالم وزیر مشال راډیو ته وویل چې د خیبر پښتونخوا د ټرانسپورټي چارو وزیر شاه محمد وزیر د جون پر ۱۷مه پرلت ته ورغلی وو او د امنیت په برخه کې یې ورڅخه د عملي اقدام لپاره دوې ورځې وخت وغوښت.
د نوموړي په خبره، صوبايي وزیر ورته وویل چې د جون پر ۱۸مه حکومت د راتلونکي مالي کال بودیجه وړاندې کوي او تر هغې وروسته به په جانیخېلو کې د امنیت لپاره عملي ګامونه اخلي.
ډاکتر ګل عالم وزیر زیاته کړه چې په جانیخېلو کې یې پرلت نن پر ۱۷مه ورځ هم روان دی خو د اسلام اباد پر لوري د لاریون پلان یې تر اتواره (یا یکشنبې) ځنډولی دی.
د جانیخېلو اوسېدونکو د مې پر ۳۱مه د یوه ځايي مشر ملک نصیب خان تر وژنې یوه ورځ وروسته احتجاجي پرلت پیل کړ او د نوموړي د مړي له ښخولو انکار کوي.
دوی وايي، حکومت دې په مارچ کې د څلور ځوانانو تر وژنې وروسته ورسره د سیمې د امنیت په اړه کړې موافقه عملي کړي، د ځوانانو او د ملک نصیب خان په وژنه کې دې ککړ کسان ونیسي او د ځايي مشر کورنۍ ته دې تاوان ورکړي.
د بنو انتظامیه وايي، موافقې ته ژمنه ده او هرو مرو به یې عملي کوي.
