په پاکستان کې د کورونا وایرس د څار او قابو کولو ملي ادارې په ملک کې د وایرس نوې اومېکرون بڼې زياتيدونکې کيسونو مخنيوي لپاره د جنورۍ له ۱۷مې نوي بنديزونه عملي کوي.
يادې ادارې دا اعلان د جنورۍ پر ۱۵مه له هغه وروسته په يو بيان کې کړې چې په ملک کې یې د کورونا وايرس نوې بڼې کيسونو کې د زياتوالي جاج اخستو لپاره غونډه وکړه.
په غونډه کې د پروازونو او په ولسي ټرانسپورټ ځايونو کې د خوراک پر خدماتو د جنورۍ له ۱۷مې د بنديز لګولو فيصله شوې ده.
د دې ترڅنګ د تعليم او صحت صوبايي وزيرانو غونډه د جنورۍ پر ۱۷مه رابلل شوې ده چې د کورونا وايرس د مخنيوي لپاره په نویو لارښوونو خبرې وکړي.
د سيند صوبې د وزيراعلا مراد علي شاه په مشرۍ کې د کورونا وايرس مخنيوي لپاره جوړې کاري ډلې هم د جنورۍ پر ۱۵مه غونډه کړې ده.
د اعلا وزير له دفتره پر ټويټر پاڼه خپاره شوي بيان کې ويل شوي چې په صوبه کې د کورونا وايرس اومېکرون بڼې کيسونو کې د زياتوالي له کبله به د احتياطې لارښوونو عملي کولو لپاره سختي کوي.
خو بیان زیاتوي چې پر دې هر څه سربېره به ټولې تعليمي ادارې خلاصي وي.
د مراد علي شاه په مشرۍ کې شوې دې غونډې دا پريکړه هم کړې چې په سرکاري محکمو کې د ماسک نه لګوونکو افسرانو خلاف به د جرمانې په توګه د يوې ورځې تنخا ګرځوي.
بیان زیاتوي چې د دې تر څنګ به په ټولو ولسي ځايونو کې د تمبوزک یا ماسک اچول لازمي وي.
دا په داسې حال کې ده چې په پاکستان کې په تېرو ۲۴ ساعتونو کې د کورونا وایرس ۴۰۲۷ پېښې ثبت شوې دي.
د کورونا وایرس په اړه د حکومتي ووبپاڼې له شمېرو سره سم، په پاکستان کې تر اوسه تر ۱۳ لاکه او ۲۴ زره زیات کسان په دې ناروغۍ اخته شوې دي.
د یادې ویب پاڼې په لیکنه، تر اوسه له دې وبا څخه تر ۲۹۰۰۰ زيات کسان مړه شويدي. په دې کې نهه تنه د جنورۍ پر ۱۵مه مړه شوي دي.
بل پلو تر اوسه له کورونا څخه تر ۱۲ لاکه او ۶۳ زره زیات کسان جوړ شوي هم دي.
د روغتیا نړیوال سازمان وايي، اومېکرون بڼه د پخوانیو بڼو پرتله په چټکۍ خپرېږي. د چین هیواد له ووهان څخه د پیل شوي کورونا وایرس دا نوې بڼه تر اوسه د نړۍ په زیاتره هیوادونو کې خپره شوې ده.
