د خیبر پښتونخوا د قانون نګران صوبايي وزیر او پخوانی قاضي ارشد حسین شاه د نومبر پر ۱۲مه د یادې صوبې د نګران اعلا وزير په توګه غوره شوی دی.
د خيبر پښتونخوا پخوانی اعلا وزیر محمود خان او په اسمبلۍ کې د مخالفه ډلو مشر اکرم خان درانی د نوي لنډمهاله اعلا وزیر لپاره د سيد ارشد حسين شاه پر نامه سلا شوي او د هغه نوم یې ګورنر ته لېږدولی وو.
د ګورنر دفتر د نومبر پر ۱۲مه په یو خبر پاڼه کې پخلی وکړ چې ګورنر غلام علي د پخواني قاضي سید ارشد حسین شاه د نومول کېدو منظوري ورکړې ده.
دا له هغه وروسته ده چې د خیبر پښتونخوا نګران اعلا وزیر محمد اعظم خان د نومبر پر ۱۰مه ناوخته د ورپېښې ناروغۍ له کبله مړ شو.
په پېښور کې د اعلا وزیر له دفتره د نومبر پر ۱۱مه په یو بیان کې وویل شو چې اعظم خان د خراب شوي صحت له کبله د نومبر پر ۱۰مه د پېښور په یو روغتون کې داخل کړل شوی وو او په هغه شپه ناوخته یې سا ورکړې وه.
د خیبر پښتونخوا ګورنر غلام علي د اعظم خان تر مړینه وروسته محمود خان او اکرام خان دراني ته یو لیک لیږلی وو چې د بل نګران اعلا وزیر غوره کولو لپاره د اساسي قانون د (۱ اې) ۲۲۴مې مادې له مخې د مشورې بهیر پیل کړي.
غلام علي د نومبر پر ۱۱مه په پېښور کې خبريالانو ته دا هم ویلي وو چې د پاکستان ايين په دې اړه وضاحت نه لري چې که د یو صوبې نګران اعلا وزیر مړ شي، نو پر ځای به یې څوک ټاکل کېږي.
د اعظم خان تر مړینه وروسته په پاکستانیو او ټولنیزو رسنیو کې په دې اړه بحث تود شوی وو چې اوس به د هغه ځای ناستی کومه اداره او څنګه ټاکي؟
خو د پاکستان د اطلاعاتو نګران وفاقي وزیر مرتضا سولنګي پر ایکس پاڼه په خپاره کړي بیان کې دا خبره رد کړې چې د نګران اعلا وزیر تر مړینه وروسته یو قانوني بحران رامنځ ته شوی دی.
نوموړي لیکلي چې د پاکستان ایین په دې اړه څرګند دی. د ده په وینا، "ګورنر، چیف سیکرټري او ټول صوبايي حکومت باید خپل کار ته دوام ورکړي."
د پاکستان نګران وزيراعظم انوار الحق کاکړ د اعظم خان په مړينه خفګان څرګند کړی دي. د اعظم خان مړی د نومبر پر ۱۱مه د خیبر پښتونخوا د چارسدې په پړانګو کې خاورو ته وسپارل شو.
اعظم خان د ۲۰۲۳م کال د جنورۍ پر ۲۱مه نېټه د خیبر پښتونخوا د نګران اعلا وزیر په توګه سوګند پورته کړی وو.
نوموړي له پېښور او لندنه د قانون په برخه کې زده کړې وې. هغه د خيبر پښتونخوا چيف سېکرټري او همداسې د وفاقي وزارتونو، مذهبي چارو او پیټروليم وفاقي سيکرټري هم پاتې شوی دی.
د خیبر پښتونخوا نوی لنډمهاله اعلا وزیر سید ارشد حسېن شاه د ایبټ اباد ضلعې اوسېدنکی دی. نوموړي په ایبټ اباد کې وکالت کړی، د خېبرپښتونخوا ایڈیشنل ایڈووکیټ جنرل پاته شوی، د پاکستان ډپټې اټارني جنرل اوسېدلی او په ۲۰۲۲م کال کې د ګلګت بلتستان د چيف جسټس په توګه ریټایر شوی وو.
سید ارشد حسېن شاه د ۲۰۲۳م کال له پیله د خیبر پښتونخوا په نګرانه کابینه کې د قانون او اوقافو سرپرست وزیر هم وو.
