له بر جنوبي وزيرستانه د صوبايي اسمبلۍ څوکۍ ته خپلواک نوماند وایي چې پولیس یې پلویان ځوروي او انتخاباتي کیمپېن ته یې نه پریږدي.
اصف خان، چې اصلاً د پاکستان تحريک انصاف غړی دی خو د هغه ګوند د انتخابي نخښې نه ترلاسه کېدو له وجې ازاد امېداور شوی دی، د جنورۍ پر ۲۱مه مشال راډیو ته وویل چې د پوليسو د چاپو له وېرې پټ ګرځي.
په بر جنوبي وزيرستان کې د تحريک انصاف نور غړي هم وايي چې نه يوازې په هغه ضلع بلکې په ټانک او ډېره اسماعيل خان کې یې هم د ګوند ملګري کیمپېن نه شي کولای.
په دې اړه د ټانک د پوليسو مشر افتخار علي شاه مشال راډيو ته يوازې دومره وويل چې پولیس د "انتخاباتي کمېشن پر احکاماتو" عمل کوي او له نورو جزییاتو ورکولو یې ډډه وکړه.
بلخوا په جنوبي وزيرستان کې د انتخاباتي کمېشن مشر محمد بلال وايي، په هره يوه ضلع کې د انتخاباتي چارو د څارنې لپاره افسر مقرر شوی او د ګوندونو غړي کولای شي خپل شکايتونه د هغه په دفتر کې جمع کړي.
دا په داسې حال کې ده چې د پاکستان سپريم کورټ د جنورۍ پر ۱۳مه په يوه پرېکړه کې پاکستان تحريک انصاف ته د انتخاباتو لپاره د کرکټ بيټ یا بلې د نخښې نه ورکولواقدام پرځای وباله. تر هغې وروسته کمېشن د تحريک انصاف کانديدانو ته بېلابېلې نخښې ورکړې او هغوی په ازاد حيثيت کې انتخابات کوي.
په پاکستان کې د لیک لوست کچ ټیټ دی چې له وجې یې انتخاباتي کمېشن ګوندونو او نوماندانو ته ځانګړې نخښې ورکوي چې دا بیا له هغو کسانو سره مرسته کوي چې د نوماند نوم نه شي لوستای خو نخښې پېژني او د خپلې خوښې ګوند یا امېدوار ته ووټ ورکوي.
د انتخاباتي کمېشن د اعلان له مخې ټاکل شوې چې په پاکستان کې د قامي او صوبايي اسمبلیو انتخابات د فبرورۍ پر اتمه وشي.
