د مومندو کاروباریانو په ګنداو کې له درو ورځو راهیسې احتجاج پیل کړی او له حکومته د امنیت غوښتنه کوي.
په احتجاج کې شریک زیاتره کسان د مرمرو د ډبرو تراشلو د کارخانو مالکان دي.
د دوی په استازیتوب، ظفر سلیم د جون پر درېیمه مشال راډیو ته وویل چې نامعلومه وسلوالو یې یوه کارخانه سوځولې او د باج ورکولو لپاره ورته ټېلېفوني ګواښونه کوي.
هغه زیاته کړه چې د ناامنۍ له وجې ځوانان بې روزګاره کېږي او کارخانې بندېږي، نو ځکه باید حکومت د د ناامنۍ مخنیوي لپاره کلک ګامونه واخلي.
تر اوسه ځايي انتظامیې په دې اړه څه نه دي ويلي. خو په تېر کې د مومندو پولیسو په ټولنیزو رسنیو خپرو کړو معلوماتو کې ویلي وو چې که هر کاروباري ته د باج لپاره ټېلېفون کېږي، هغه دې د پلټنو لپاره له پولیسو سره شریک کړي.
