په سوات کې د پاکستان حکومت له خوا د اعلان شویو ترهګرۍ ضد عملیاتو خلاف د "امن مارچ" په نوم احتجاجي لاریون شوی دی.
د مینګورې ښار په نشاط څلورلاره کې د جولای درېیمې مظاهرې اعلان د خيبر پښتونخوا د ځنګلونو او چاپېریال ساتنې چارو وزير فضل حکيم يوسفزي کړی وو چې پکې د تحریک انصاف ګوند د غړو ترڅنګ د سوات يوشمېر اوسېدونکو ګډون وکړ.
احتجاجیانو په لاسونو کې لوحې نیولې وې چې ورباندې د سولې شعارونه ليکل شوي ول.
فضل حکیم یوسفزي لاریون ته په وينا کې دعوه وکړه چې په سیمه کې یې "امن دی" نو ځکه هلته د پوځي عملیاتو "هېڅ ضرورت" نه شته.
د مظاهرې ګډونوال او د تحریک انصاف يو ځايي مشر شاهد علي خان مشال راډیو ته وويل چې نور په سوات کې د امنیتي پوستو، ناکو او کورونو د تلاشۍ اجازه نه ورکوي.
دا په داسې حال کې ده چې د جون پر ۲۲مه د پاکستان وزیراعظم شهباز شريف په مشرۍ د لوړپوړې کمېټۍ په غونډه کې پرېکړه شوې وه چې د "ترهګرۍ او سختدريځۍ" پرضد به د "عزم استحکام" په نوم عملیات کوي.
د اطلاعاتي او خپرونو چارو وزارت د جون پر ۲۳مه په بیان کې وویل چې حکومت د ترهګرۍ پرضد د ملي کیمپېن په ترڅ کې د "ټولنیزو او اقتصادي اقداماتو" له لارې د "خلکو د حقیقي یا اصلي اندېښنو د ځوابولو او د سختدریځو رجحاناتو د مخنیوي" لپاره د سازګار چاپېریال ایجادولو پرېکړه کړې ده.
تر هغې وروسته يوشمېر حکومت مخالفه ګوندونو او قبايلي مشرانو د عملیاتو مخالفت وکړ او دا يې د ولس په زيان وبلل.
خو د جون پر ۲۴مه د وزيراعظم دفتر په يوه خبرپاڼه کې وويل چې نوي عمليات د پخوانيو په څېر نه دي او دا ځل به پر دومره پراخ کچ جنګ نه کېږي چې خلک بې کوره شي.
