پښتون ژغورنې غورځنګ (پي ټي اېم) وايي، د کوز جنوبي وزیرستان پولیسو یې یو فعال شهزاد وزیر نیولی دی.
د غورځنګ د مرکزي کمېټې یو غړي فرمان وزیر د جولای پر ۳۱مه مشال راډیو ته وویل، شهزاد وزیر چې د پي ټي اېم د کوز جنوبي وزیرستان ضلعي مشر دی چې پولیسو یې پرضد د ترهګرۍ په ګډون یوشمېر مقدمې کښلې دي او د عامه نظم زیانمنولو قانون (مېنټېننس اف پبلک ارډر یا اېم پي او) د درېیمې مادې له مخې یې نیولی دی. "پر شهزاد وزیر د واڼه سټي تاڼې او د اعظم ورسک تاڼې په شمول په ګڼو تاڼو کې پرچې کټ شوي دي. د نوموړي پر ضد ټولې ۲۴ [مقدمې] دي."
وزیر وايي، په اتو قضیو عدالت شهزاد وزیر ته ضمانت ورکړی دی خو د ډېره اسماعیل خان یو عدالت یې ضمانت منسوخ کړ او د جنوبي وزیرستان پولیسو ته یې وسپاره.
د جنوبي وزیرستان مرستیال کمېشنر محمد ناصر خان د جولای پر ۳۱مه مشال راډيو ته وویل چې شهزاد وزیر یې ځکه نیولی چې په امن جرګه کې یې "منفي خبرې" کولې او د امنیت "مسلې یې جوړولې." هغه تور پورې کړ چې د پښتون ژغورنې غورځنګ فعالیتونه د د ولس د "خیر ښېګړې خلاف" دي نو ځکه یې د عامه نظم ساتنې د قانون له مخې ونیوه.
ده زیاته کړه چې پر وزیر ۲۶ مقدمې دایرې شوې دي.
پي ټي اېم د پولیسو دعوې ردوي او په بیا بیا یې ویلي دي چې د فعالیتونه یې سوله ییز او د پاکستان له ایین او قانون سره سم دي.
د وزیر وکیل عبدالرحمان پر خپل موکل لګېدلي تورونه بې اساسه بللې دي او هوډ یې ښکاره کړی دی چې په های کورټ کې به یې د ضمانت درخواست جمع کوي.
د پښتون ژغورنې غورځنګ غړي او مخکښه مشران تر دې مخکې هم د ترهګرۍ، ریاست پرضد د خلکو پارولو او د ریاست او ادارو پر ضد د ویناګانو په تورونو نیول شوي دي چې بیا وروسته په ضمانت خوشې شوي دي.
