د عوامي نیشنل ګوند مشر اېمل ولي خان وايي، د پاکستان د ایین ۲۶م ترمیم به په هغه صورت کې مني چې وفاقي حکومت یې شرطونه ومني.
د عوامي نیشنل ګوند مرکزي وياند احسان الله د سېپټېمبر په ۱۷مه مشال راډیو ته وویل چې اېمل ولي خان د ګوند د مشورتي کمېټې په غونډه کې وویل چې وفاقي حکومت دې د خیبر پښتونخوا له نومه د "خیبر" کلمه لیرې کړي، د اییني څوکیو لرونکو چارواکو کاري موده دې نه غځوي او د سیاستوالانو مقدمې دې په پوځي عدالتونو کې نه چلېږي.
دا په داسې حال کې ده چې ټاکل شوې د پاکستان واکمن اېتلاف په اساسي قانون کې د بدلونونو لپاره د اييني پېکېج په نوم مسوده پارلېمان ته وړاندې کړي.
داسې ویل کېدل چې حکومت غواړي چې د پاکستان د سپریم کورټ او های کورټونو د قاضیانو د دندو او نورو چارو لپاره د اییني بدلونونو قانوني مسوده قامي اسمبلۍ او سېنېټ ته وړاندې کړي خو د سېپټېمبر پر ۱۶مه د مخالفو ګوندونو استازو د قامي اسمبلۍ په غونډه کې په ویناګانو کې هغه بدلونونه د قاضیانو پر واک ګوزار وبلل.
د عوامي نیشنل ګوند احسان الله وویل، که هغه اییني بدلون د شخصي ازادۍ، بنیادي حقونو، جمهوري اصولو او د صوبو له خپلواکۍ سره په ټکر کې وي نو اېمل ولي خان به یې مخالفت کوي.
ده زیاته کړه چې د عوامي نیشنل ګوند مشر هوډ ښوولی چې یوازې د هغه اییني بدلون ملاتړ کوي چې پکې د ولس او هېواد ګټه وي.
د پاکستان حکومت لا د اېمل ولي خان د څرګندونو او شرطونو په اړه څه نه دي ویلي خو د قانون وفاقي وزیر اعظم نذیر تارړ په قامي اسمبلۍ کې هوډ وښود چې د ټولو ګوندونو د باور تر تر لاسه کولو وروسته به مسوده د پارلېمان دواړو جرګو ته وړاندې کړي.
د پاکستان په اساسي قانون کې د بدلون لپاره د قامي اسمبلۍ او سېنېټ د خورا لوی اکثریت ضرورت وي او همدا لامل دی چې اېتلافي حکومت به د ډېرو ګوندونو ملاتړ ته اړتیا ولري.
په ۲۰۱۰ز کال کې د پیپلز ګوند په مشرۍ پخواني اېتلافي حکومت، چې عوامي نیشنل ګوند هم پکې شامل وو، د هېواد په اساسي قانون کې ۱۸م بدلون کړی وو چې له مخې یې د شمال مغربي سرحدي صوبې، چې مختصراً صوبه سرحد بلل کېده، نوم خیبر پښتونخوا ته اړول شوی وو.
