د پاکستان پیپلز ګوند مخکښ سیاستوال فیصل کریم کونډي د خیبر پښتونخوا د ۴۰م ګورنر په توګه لوړه کړې ده.
د پېښور های کورټ مشر قاضي اشتیاق ابراهیم د ګورنر په ماڼۍ کې نوموړي ته سوګند ورکړ.
د پاکستان ولسمشر اصف علي زرداري کونډی د جمعیت علمای اسلام (ف) سیاستوال غلام علي پر ځای د صوبې نوی ګورنر وټاکه.
دا په داسې حال کې ده چې مسلم لیګ (ن)، پیپلز پارټۍ او یوشمېر نورو ګوندونو د فبرورۍ اتمې تر عامو انتخاباتو وروسته په وفاق او بلوچستان کې د ګډو حکومتونو جوړولو او داراز، په خپل مینځ کې د یوشمېر لوړپوړو څوکیو د وېشلو موافقه کړې وه. پیپلز ګوند البته په وفاقي حکومت کې وزارتونه نه دي اخیستي.
د کونډي لوړې په مراسمو کې د پيپلز ګوند غړو، د بلوچستان اعلا وزیر سرفراز بګټی، د مسلم لیګ (ن) او د نورو ګوندونو غړو ګډون کړی وو خو د خیبر پښتونخوا اعلاوزیر علي امین ګنډه پور نه وو ورغلی.
د ډېره اسماعیل خان اوسېدونکی فیصل کریم کونډی په ۲۰۰۸ز کال کې د قامي اسمبلۍ غړی ټاکل شوی وو او پر هم هغه کال د قامي اسمبلۍ مرستیال سپيکر شوی وو. نوموړی تر دې وړاندې د پيپلز ګوند د اطلاعاتو مرکزي سېکرټر هم پاتی شوی دی.
د پاکستان په صوبو کې ګورنر د دولت یا د ریاست او د وفاق د استازي په توګه دنده ترسره کوي او له انتظامي پلوه زیات واک نه لري.
