په تورخم کې چارواکي وايي، په تېرو درو ورځو کې یې شاوخوا ۱۰۰ افغانانو ته پاکستان ته د داخلېدو اجازه نه ده ورکړې.
د خیبر ضلعې په تورخم کې د وفاقي تحقیقاتي ادارې (ایف ای اې) یوه چارواکي یاسر خان د جولای پر۲۴ مه مشال راډیو ته وویل چې هغو افغان وګړو د پاکستان طبي ویزې لرلې خو هغوی روغ ول او ناروغي یې نه لرله.
یاسر خان تور پورې کړ چې هغو افغان وګړو په کابل کې د پاکستان له سفارته په جعلي اسنادو طبي ویزې ترلاسه کړې وې.
چارواکی وايي چې اصلي ناروغانو ته په تورخم کې ویزې ورکوي او په وینا یې چې افغان ډرېوران بیا د ځانګړې پرچې یا کاغذ په لرلو د پاکستان او افغانستان ترمینځ تګ راتګ کوي.
خان زیاته کړه چې د نورو ویزو لرونکي افغانان یې پر تورخم نه دي ایسار کړي.
د طالبانو حکومت لا په دې اړه څه نه دي ویلي او پاکستان ته له داخلېدو ګرځول شویو افغانانو هم څه نه دي ویلي.
پخوا به پاکستان له ناروغانو سره د کورنۍ یو وګړي ته هم بې له ویزې او پاسپورټه هلته د ورتګ اجازه ورکوله خو اسلام اباد د روان کال په اپرېل کې ناروغانو ته بې له سفري اسنادو پاکستان ته د داخلېدو اجازې نه ورکولو امر وکړ.
په تورخم کې د اېف ای اې چارواکي وایي، د انساني خواخوږۍ په بنیاد یوازې هغو ناروغانو ته اجازه ورکوي چې بیړنۍ درملنې ته اړتیا لري.
