د پاکستان په پوهنتونونو کې په زدکړو بوخت افغان زده کوونکي وایي، د ګرانۍ له وجې یې د سکالرشیپ په پیسو ګزاره نه کېږي او افغانستان ته د تګ راتګ پر مهال له ستونزو سره مخ کېږي.
د اګست پر ۲۹مه، له مشال راډیو سره په خبرو کې یو شمېر زده کوونکو وویل چې کله په رخصتیو کې افغانستان ته لاړ شي نو د بېرته ستنېدو پر مهال په تورخم کې نه را پرېښودل کېږي. دوی د پاکستان له حکومته غوښتنه وکړه چې د سکالرشیپ پیسې دې زیاتې او د هغوی د ویزو مسله دې یې حل کړي.
په پېښور پوهنتون کې د میډيکل یا طب زده کوونکي عنایت مومند مشال راډيو ته وویل، زده کوونکو ته دې د تګ راتګ پر مهال ځانګړی پام وشي.
نوموړي زياته کړه، "په تېر اختر کې چې موږ خپلو کورونو ته تلو، نو اجازه یې نه راکوله، پکار ده چې د زده کوونکو لپاره ځانګړې تګلاره جوړه شي. بله ستونزه دا ده چې موږ ته د تعلیمي اسنادو اېکویلېنسي (متبادل) سرټيفيکېټ (سند) ژر نه میلاوېږي او د پاکستان له حکومت او افغان ;ونسلګرۍ سره دا اسناد تر اته یا نهو میاشتو پورې ایسار وي چې ورسره د زده کوونکي پوره کال ضایع کېږي."
دا هم وګورئ:
لسګونه افغانان د اسلام اباد له اسلامي پوهنتونه فارغ شولیو پاکستانۍ اداره له افغان زده کوونکو سره مالي مرستې کوي د پېښور پوهنتون افغان زده کوونکي د اسنادو ترلاسه کولو ستونزې لريپه پاکستان کې د زدکړو لپاره ګڼو افغان زده کوونکو ته سکالرشيپونه ورکړل شوي دي. دا هغه زده کوونکي دي چې د علامه اقبال سکالرشیپ ترلاسه کولو وروسته په بېلابیلو پوهنتونونو کې لوړې زدکړې کوي.
یو بل افغان زده کوونکی اکرام الله وایي د سکالرشیپ تر اخیستو وروسته د تعلیم ویزه لري خو پر دې سربیره هم پر تورخم د تګ راتګ پر مهال زیاتره وخت نه پرېښودل کېږي. "کله چې هم تورخم دروازه وتړل شي نو بیا موږ هغې غاړې ته پاتې شو او د کلاسونو له اخیستو محرومه کېږو."
په پېښور کې د طالبانو د کونسلګرۍ یو چارواکي< چې له رسنیو سره یې د خبرو اجازه نه لرله، د نوم پټ ساتلو په شرط مشال راډیو ته وویل، هغه زده کوونکي دې له کونسلګرۍ سره تماس ونيسي چې غوښتنې یې له اړوندو چارواکو سره شریکې کړي.
د پاکستان حکومت د ۲۰۲۲ز کال د فبرورۍ پر ۲۲مه د افغان زده کوونکو لپاره د علامه اقبال په نوم په مسلکي او نورو عادي پوهنتونونو کې د ۳،۰۰۰ سکالرشيپو (بورسونو) اعلان کړی وو.
تر هغه يوه مياشت وروسته حکومت ۱،۰۰۰ نور سکالرشيپونه نور هم ور زیات کړل شو چې اوس یې شمېر ۴،۰۰۰ دی.