پښتون ژغورنې غورځنګ (پي ټي اېم) مشر منظور پښتین د خیبر په جمرود کې د اکتوبر ۱۱مې د جرګې لپاره د میدان پرانیسته کړې ده.
د غورځنګ د خیبر مشر افتاب شینواري مشال راډیو ته وویل چې د سېپټېمبر پر ۲۹مه د غورځنګ مشر منظور پښتین په ریګي للمه سيمه کې میدان انتخاب کړ.
پي ټي اېم ویلي دي چې د اکتوبر پر ۱۱مه، په خیبر کې لویه غونډه کوي، چې د "پښتنو قامي عدالت" په نوم یادېږي.
غورځنګ د جرګې لپاره په خپله رسمي اېکسپاڼه ویډیو او عکسونه خپاره کړي چې پکې د غورځنګ مشر منظور پښتین په میدان کې کولنګ (ګېنتری) وهي او د سیمې د قبایلو مشرانو سره په شریکه دعا کوي.
د پرانیستې پر موقع ملک نصیر کوکيخېل، د جماعت اسلامي یو مخکښ خان ولي اپریدی، سیاسي فعال عمران اپریدی او یو شمېر نور مشران او ځوانان هم ول.
د پي ټي اېم د خیبر مخکښ افتاب شینواي وویل چې دا په سلګونه جریبه ځمکه ده چې پراخ میدانونه لري. د ده په خبره، د اکتوبر پر ۱۱مه نېټه به هلته له بېلا بېلو سیمو څخه پښتانه ورشي او خپل کېپمونه به ولګوي.
ریګې للمه د پېښور پرمختیایي ادارې تر انتظام لاندې ده
هغه وویل د ریګي للمې ځمکه د پېښور پرمختیایي ادارې(پي ډي اې) تر انتظام لاندې ده او د ریګي ماډل ټاون سره نېږدې پرته ده. هلته یوه لاره د پېښور له ناصرباغ سړک څخه ورغلې او بله هغه يې له پيښور کارخانو پاټکه څخه تېرېږي، او خلک له جمرود مرکزي بازار څخه په اسانۍ سره ورڅخه ورتلای شي.
د پرانیستې له مراسمو مخکې، ملک نصیر کوکيخیل د منظور پښتین سره په جمرود کې یوې ولسي غونډې ته د وینا پر مهال وویل چې دوی د خپل قام په مشترکه ځمکه باندې ټولو پښتنو ته هرکلی وايي. دا غونډه یوازې د پي ټي اېم نه، بلکې د ټولو پښتنو غونډه ده او دوی به د دې غونډې ټول مېلمانه ځایوي، حجرې به ورته پرانستې وي، او په دې قامي عدالت او جرګه کې به هر ډول مرسته کوي.
دا هم وګورئ:
منظور پشتين وايي د اکتوبر تر جرګې وړاندې د ترهګرۍ جنګ ځپلو پښتنو شمېرې ټولويپشتین: ریاست دې د پښتنو سیمو کې د عملیاتو پر ځای خلکو ته د وسایلو واک ورکړيپشتین: د پښتنو مشران به د اکتوبر ۱۱مې په غونډه کې د ستونزو د حل لپاره ګډه پرېکړه وکړيغورځنګ وايي پښتون قامي عدالت په نامه هغه جرګه به درې ورځې دوام وکړي چې پکې به پښتانه په سیمه کې د روانې ناامنۍ، جبري لادرکیو او د پښتون مېشته سیمو د طبیعي زېرمو او وسایلو د واک ستونزو د هواري په اړه ګډه پرېکړه وکړي.
پښتین د هغې غونډې اعلان د جولای پر ۱۲مه د شمالي وزيرستان په اسد خېلو کې د غورځنګ د یو مخکښ ګیله من وزیر په جنازه کې ورغونډو شويو زرګونو کسانو ته په وينا کې کړی وو.
د جرګې تر اعلان وروسته پښتین له یوشمېر سیاسي مشرانو سره وکتل د پښتنو بېلا بېلو ضلعو ته ولاړ او د سیمې مشرانو ته یې په جرګه کې د ګډون بلنه ورکړه.
غورځنګ وایي په میدان کې د خیبر پښتونخوا، بلوچستان او کراچۍ پښتنو لپاره کیمپونه جوړوي چې په لومړۍ او دویمه ورځ به د سیمې مشران په خپلو کې مشورې کوي او په دریمه ورځ به د ستونزو د حل په اړه خپله ګډه پرېکړه اعلان کړي.