د پاکستان وزیراعظم عمران خان په جلال اباد کې د پاکستانیو ویزو ترلاسه کولو پر مهال په ټېل ماټېل کې د خلکو پر مرګ-ژوبله خپګان ښوولی دی.
نوموړي د اکتوبر ۲۱مې پر ماخوستن پر ټوېټر په بیان کې لیکلي چې د "افغانانو دردوونکې مړینې ژور خپګان" وررسولی دی، له ټولو کورنیو سره خواخوږي ښيي او د "ژوبلو د ژر رغېدو دوعا" کوي.
نوموړي دا بیان تر هغو څو ساعتونه وروسته خپور کړی چې سهار مهال زرګونه کسان د ننګرهار د مرکز جلال اباد د فوټبال په لوبغالي کې د پاکستان ویزې ټوکنونو ترلاسه کولو لپاره ورغونډ شوي ول چې د ټېل ماټېل پېښه وشوه او پکې د ۱۱ ښځو په ګډون ۱۵ کسان ووژل او ۱۳ ژوبل شول.
د ننګرهار ولایت سکتوري رييس او د پاکستان د وېزې د تر لاسه کولو د اسانچارې کمېټې مشر فضل الربي همیم مشال راډيو ته وویل: "څومره خلک چې دلته راغلي ول، موږ له ټولو پاسپورټونه اخيستل، هېڅوک نه پاتې کېدل، خو ټولو ازدهام راوړ، جالۍ يې ماتې کړې."
په عین وخت کې په کابل کې د پاکستان سفارت هم په یوه بیان کې د پېښې ښکار شویو له کورنیو سره خواخوږي ښوولې ده.
د سږني کال د مارچ میاشتې په نیمايي کې چې د کورونا وایرس وبا خپرېدو له امله پاکستان له افغانستان سره ټولې لارې تړلې وې، ورسره د زرګونو هغو کسانو ویزې هم ختمې شوې چې کورونه يې په پاکستان دي او یا یې هم هلته د نورو چارو په تړاو تګ راتګ کولو.
بل د افغانستان ډېر وګړي د درملنې لپاره پاکستان ته ځي او د ویزو د ترلاسه کولو لپاره سلګونه سخت ناروغان هم په ګېنټو ګېنټو انتظار باسي.
د ننګرهار والي ضیاالحق امرخېل په شوې پېښه خواشیني څرګنده کړې او له خلکو یې غوښتي چې د نظم په مراعتولو له ګڼې ګوڼې مخنیوی او ډډه وکړي.
له تېرې یوې اوونۍ راهیسې چې په جلال اباد کې د پاکستانۍ ویزو ورکولو چارې پیل شوي، ولایتي ادارې او مدني فعالانو په ګډه د پاکستان له کونسلګرۍ بهر په فوټبال لوبغالي کې د ویزې د تر لاسه کولو لپاره خلکو ته د ټوکنو ورکولو بهیر پیل کړی وو.
د فېسبوک تبصرې