نجیب عامر، مشال راډیو
پراګ - د مصر یو عدالت د شنبې پر ورځ له واکه لرې کړل شوي، پخوانی ولس مشر حسني مبارک او د کورنیو چارو پخوانی وزیر حبیب ال عدلي ته د ټول عمر بند سزا واوروله.
حسني مبارک د جون د دویمې نېټې پر سهار په یوه چورلکه کې د پولیسو هغې اکاډمۍ ته ورسول شو ه چې د ده په اړه پریکړه اورول کېده، بیا وروسته نوموړی پر سټرېچر (د ناروغانو کټ) عدالت ته حاضر کړل شو.
قاضي محمد رفعت د سزا د اورولو پرمهال داسې وویل :
((عدالت ټولو تورنو کسانو ته د هغوی په موجودګۍ کې سزا اورولې، پرته له دویم تورن کس نه چې هغه ته په غیاب کې دا سزا اورول کیږي. لومړی ، محمد حسني ال سعید مبارک ته د خلکو په وژلو کې د لاس درلودلو په تور د ټول عمري بند سزا اورول کېږي.))
عدالت د مبارک زامن د درغلیو له مقدمې بري اعلان کړل.
تر پرېکړې اوریدو وروسته، په عدالت کې موجودو اورېدونکو مظاهره وکړه.
د مصر دولتي ټیلي وېژن د عدالت فیصله نېغ په نیغه خپره کړه.
حسني مبارک دا مهال ۸۴ کالن دی.
