د افغان استخباراتو يو چارواکي د نوم نه ښودو په شرط نن مشال ريډيو ته وويل چې ملا منصور د محمد ولي په نامه د پاکستان پاسپورټ او شناختي کارډ درلود. پرون ناوخته نوازشريف په لندن کې خبريالانو ته وويل چې په دې اړه پلټنې کوي.
هغه وويل: ((د محمد ولي نومي کس پاسپورټ او شناختي کارډ موندل شوي دي. معلومه شوې چې هغه د قلعه عبدالله سيمې دی. تر اوسه پورې په دې اړه نور معلومات نشته . يو يا دوه ځای مو نور هم لټول پېل کړې چې آيا دغه کس د دغه سيمې سره تعلق لري کنه. نو موږ په حتمي توګه دا نه شوی ویلی چې وژل شوی کس ملا منصور دی او کنه!))
د ملا منصور په جيب کې یورو وې او له ایرانه د پاکستان خاورې ته د اوښتو پرمهال یې په روپیو بدلې کړې.
افغان چارواکو په ډرون بريد کې د ملا منصور وژل تاييد کړي خو طالبان يې نه مني. د پاکستان د بهرنیوچارو وزارت په پرونۍ خبرپاڼه کې ويلي چې وژل شوی تن له ايرانه پاکستان ته روان وو چې موټر یې په ډرون حمله کې په نښه شو.
د امريکا د دفاع وزارت بيا وايي چې ملا منصور د سولې د خبرو خلاف وو نو ځکه يې تر بريد لاندې ونيو خو دا چې هغه وژل شوی کنه، په دې اړه به تر پلټنو وروسته معلومات ورکوي.
د پاکستان د بهرنیو چارو وزارت په یوه بیان کې د ملا منصور مړینه نه رد کړې او نه یې تایید کړې خو یادونه یې کړې چې په دې اړه تحقیقات روان دي.
بیان یادونه کوي چې امریکايي چارواکو پرون د بې پیلوټه الوتکې له حملې وروسته اسلام اباد ته خبر ورکړ.
په بیان کې همدا راز د خپرو شوېو راپورونو پر بنسټ ویل شوي وژل شوی کس د ولي محمد په نوم پاکستانی پاسپورټ او د ایران ویزه درلودل او پر موټر یې د افغانستان او پاکستان سرحد ته نژدې په کوچکي سیمه کې برید وشو چې د دې موټر ډرېور محمداعظم هم په کې ووژل شو.
بیان زیاتوي، اعظم د کرایي موټرو د یوې کمپنۍ ډریور و چې مړی یې د هغه خپلوانو ته سپارل شوی خو د دوهم کس د مړي د پیژندنې لپاره، د پېښې په ځای کې د ترلاسه شوېو اسنادو او معلوماتو پربنسټ هڅې روانې دي.
چارواکو ویلي دي چې د ملااخترمنصور او د ډریور مړي وروسته د کوټې یو ملکي روغتون ته انتقال او خپلوانو ته یې وسپارل شول.
د روغتون چارواکو ویلي چې دواړه مړي ډېر سوځیدلي وو او ملامنصور ته منسوب مړی خو بیخې پیژندل کېده نه.
فرانس پرېس خبري اژانس د چارواکو له خولې په راپور کې وايي چې د محمد ولي یا په حقیقت کې د ملا منصور مړی هغه کس ته ورکړل شو چې ځان یې د محمد رفیق په نوم د هغه وراره معرفي کړ، خو چارواکو اژانس ته ویلي دي چې له نوموړي څخه هیچا ان د اسنادو پوښتنه هم ونه کړه.
د ایران او پاکستان ترمنځ په سرحدي سیمه تفتان کې د سرحد یوه چارواکي ایران ته د ملا اخترمحمدمنصور د سفر نېټې تایید کړي دي او فرانس پرېس اژانس ته یې ویلي چې د نوموړي په جېب کې یورو وې او له ایرانه د پاکستان خاورې ته د اوښتو پرمهال یې په روپیو بدلې کړې.
