د سې شنبې په ورځ د لوګر ولایت په مرکز او محمداغې ولسوالۍ کې د اوبو د ۱۶ کانالونو د جوړولو کار پیل شو.
یاد کانالونه چې خواوشاه درې سوه کیلومتره اوږدوالی لري، د ملي پیوستون پروګرام له لارې ورباندې ۲۸۶ میلیونه افغانۍ لګښت راځي، چې ودانیزې چارې به يې د یو کال په موده کې بشپړې شي.
د لوګر په محمداغې ولسوالۍ کې د کلیو د پراختیا وزیر نصیراحمد دراني د اوبو د کانالونو د کار د پیل په مراسمو کې مشال راډیو ته وویل، چې لدې کار څخه يې موخه زرګونو کسانو ته کار پیدا کول او د دې تر څنګ د اوبو سم مدیریت او د کانالونو په مسیر کې د اوبو د ضایعاتو مخینوی دی.
د کلیو پراختیا وزیر زیاته کړه، چې پدې سره به په کانالونو کې د اوس په پرتله د اوبو اندازه پنځلس سلنه ډېره شي او خواوشا څلور زره جریبه اظافه ځمکه به خړوبه کړي.
نصیراحمد دراني زیاته کړه:
((جمعاً موږ په لوګر کې ۱۶ ویالې یا کانالونه چې اوږدوالۍ په حدود ۳۰۰ کیلومتره کیږي، د دې احیا او بازسازي په مدرن شکل سره غواړو، پدې باندې ۲۸۶ میلیونه افغانۍ خرڅ کوو، د دې کانلونو ټول استنادي دیوالونه او تقویتي دیوالونه به په عصري توګه جوړیږي، د اوبو به یو موثر مدیریت کیږي، تقریباً په حدود د ۳۷۵۰ جریبه به د اوس په پرتله زیاته ځمکه خړوبیږي، .))
د کلیو پراختیا وزیر وړاندې وویل، چې پدې سره به د خلکو اقصتاد وده وکړي او کرنیز محصولات به يې بهتر او ډېر شي.
د لوګر والي حلیم فدايي د دې پروژو له اقتصادي ګټو سربیره د یاد ولایت پر امنیت د دې پروژو تاثیر ته اشاره وکړه او زیاته يې کړه، اویا زرو کسانو ته به پدې پروژو کې کار کول پر امنیت مستقیم اغېز ولري:
((امنیت یوازې په جنګ نه راځي، پدې کانالونو کې چې کله ۱۵۰۰۰ماهر او ۵۵ زره غیر ماهر کارګران په کار باندې بوخت شول، په خپله بیکاره خلک د مخالفینو له صفوفو څخه را جدا کیږي او امنیت راځي او له بل پلوه د دې کارونو قرارداد مستقیماً د خلکو او شوراګانو سره شوی دی.))
په لوګر کې د ملي پیوستون د برنامې مشر انجینر ظفر خان وايي، چې دا برنامې به ۳۳۲ کلي تر پوښښ لاندې راولي:
((په مجموعي ډول باندې لدې کانالونو نه ۵۸۳۳۷۸ کورنۍ ګټه پورته کوي، ۱۸۹ پرمختیايي شوراګانې دا تر پوښښ لاندې راولي، چې دا شوراګانې ۳۳۲ کلي لري، د دې پروژې اصلي هدف دادی چې په کانالونو کې د اوبو د ضایعاتو مخه ونیول شي او د اوبو په اندازه کې زیاتوالی راشي.))
د یادولو ده چې په لوګر کې د ملي پیوستون تر اوسه ۱۵۱۶ پروژې په بېلابېلو برخو بشپړې کړي او ګټې اخېستنې ته یې سپارلي او په زرګونو ځوانانو ته په کاري فرصتونه برابر شوي.
