اسلام اباد - د پاکستاني پوځ مشر جنرل قمر جاويد باجوه وايي افغانستان سره يې پر ډيورنډ کرښه، په مومندو او باجوړ کې د اغزن تار لګول پيل کړې دي.
د شنبې یا خالي پر ورځ د پوځ په خبرپاڼه کې راغلي چې جنرل باجوه اورکزیو او مومندو ته تللی وو او هلته يې له پوځيانو سره ليدلي دي. د باجوه له خولې زياته شوې چې د ترهګرو مخنيوي لپاره به خپله څارنه زياتوي.
تر اوسه افغان چارواکو د جنرل باجوه پر دې خبرو څه نه دې ويلي خو په پخوا وختونو کې پر ډېورنډ کرښه د دروازو او اغزن تار لګولو په مخالفت کې یې ويلي چې دا د دواړو هېوادونو ترمنځ د شوو هوکړو سرغړونه ده.
پاکستان څه باندې یوې میاشتې پورې له افغانستان سره خپلې پولې تړلې وې، خو په وروستیو کې یې یو وار بیا پرانیستې.
