د پاکستان مطبوعات وايي چې د مسلم ليګ نواز ډلې رهبر نوازشريف د اتوار پر ورځ په اډياله زندان کې ناروغه شوی او ډاکټرانو په هسپتال کې د هغه د داخلولو سپارښتنه کړې ده.
ډان او جيو نيوز ويب پاڼې وايي چې د جنرال ريټايرډ اظهر کياني په مشرۍ کې د ډاکټرانو يوې ډلې په اډیاله جيل کې د نوازشريف معاينه کړې او د هغه يې په سمدستي توګه په هسپتال کې د داخلولو سپارښتنه کړې ده.
پاکستاني ولسمشر ممنون حسېن هم د دغه هېواد لنډمهالي لومړي وزیر ته ږغ کړی چې د پخواني وزیر اعظم نواز شریف صحت اندېښمن کړی دی او حکومت ته پکار ده چې د هغه د درملنې بندوبست وکړي.
ډاڼ ورځپاڼه وايي چې د زندان يوه چارواکي ورته ويلي، د نواز شريف په بدن کې اوبه کمې شوې او په وينه کې د متيازو مقدار زياتېدو له وجې د زړه رفتار ورو شوی او ښايي د دې له کبله د هغه پر ګردو هم ناوړه اثر وشي.
نوازشريف، د هغه لور مريم نواز او زوم کېيټن صفدر ته د کرپشن په مقدمه کې د احتساب عدالت د بند سزا اورولې وه خو دوی دا تورونه ردوي.
نور ولولئ
پرويز رشيد: په اډیاله جېل کې مو نواز شریف ته نه پرېږدي
نواز شریف: په ټاکنو کې پر غړیو د نه ګډون کولو لپاره فشار اچول کېږي
