د پاکستان د انتخاباتو د کمېشن د مالوماتو له مخې ، په دې کې د قومي اسمبلۍ ۱۱ او د څلور واړه صوبايي ۲۴ حلقې شاملې دي.
د قومي اسمبلۍ لپاره د اسلام اباد پر یوه ، د پنجاب پر اتو ، او د سند او خېبرپښتونخوا پر یوه یوهچوکۍ به ټاکنې کېږي.
د صوبايي اسمبلېو لپاره به د پنجاب پر ۱۱ ، د سند او بلوچستان په دوو دوو او د خېبرپښتونخوا پر نهه حلقو ولس رایې اچوي.
د پاکستان د الېکشن کميشن یو چارواکي خورشيد عالم مشال راډيو ته وويل چې د دې ضمني ټاکنو لپاره يې په ټول ملک کې یې نژدې ۷۵۰۰ د رایو اچولو مرکزونه جوړ کړي دي.
خورشید عالم زیاته کړه چې په دې کې تر ۱۷۰۰ زیات مرکزونه حساس ګرځول شوي دي او هلته د امنیت ټینګ ساتلو لپاره پوځ ځای پر ځای شوی دی.
هغه وویل چې د دې انتخاباتو لپاره ۶۶۱ کسانو د نامزدګۍ کاغذونه جمع کړي وو خو د ۱۶ کسانو کاغذونه رد کړل شو.
د خورشيد عالم په وينا په دې ضمني انتخاباتو کې به په لومړي ځل د نړۍ په نورو ملکونو کې ميشت پاکستاني وګړي هم خپله رايه وکاروي.
په پاکستان کې عام انتخابات د ۲۰۱۸م کال د جولايي پر ۲۵مه نېټه ترسره شوي وو چې تحریک انصاف ګوند پکې تر ټولو زیاتې چوکۍ ګټلې وې.
خو د مسلم لیګ نون او نورو اپوزېشن ګوندونو مشران تور پورې کوي چې له دوي سره درغلۍ شوې دي.
