اسلام اباد - د پاکستان صدرعارف علوي د سپریم کورټ قاضي اصف سعید کوسه د پاکستان ۲۶م چیف جسټس ګمارلی چې د میا ثاقب نثار تر تقاعد یا رېټارېدو وروسته د جنورۍ پر ۱۸مه د دندې لوړه کوي.
جسټس اصف سعید کوسه د ۱۹۵۴ز کال د ډېسېمبر پر ۲۱مه د پنجاب په ډیره غازي خان کې زیږېدلې دی.
نوموړي تر ابتدايي زده کړو وروسته په ۱۹۷۵ز کال کې د قانون زده کړې بشپړې کړې او د نور تعلیم لپاره برتانیا ته ولاړ.
کوسه هلته په۱۹۷۷ او ۱۹۷۸ز کال کې د کیمبرېج له پوهنتونه د قانون دوه بریلیکونه واخیستل.
په ۱۹۷۹ز کال کې يې وطن ته په ستنېدو د لاهور په های کورټ کې وکالت پیل کړ او په ۱۹۸۵ز کې د سپریم کورټ وکیل شو.
اصف سعید کوسه د ۱۹۹۸ز کال د مې پر ۲۱مه د لاهور های کورټ قاضي او تر دې وروسته په ۲۰۱۰ز کال کې د سپریم کورټ جج شو.
د ۲۰۰۷ز کال په نومبر کې چې پخواني پوځي واکمن جنرال پروېز مشرف بیړنی حالت نافذ کړ او ایین یې وځنډاوه نو کوسه یو له هغو قاضیانو څخه وو چې د ولسمشر له لنډمهالي امر سره یې سم د دندې لوړه و نه کړه.
کوسه په ۲۰۰۸ز کال کې د وکیلانو تر تحریک وروسته د لاهور های کورټ د قاضي په حېث وګمال شو.
جسټس اصف سعید کوسه د پخواني وزیراعظم یوسف رضا ګیلاني ضد د عدالت سپکاوي او د پخواني وزیراعظم نواز شریف پرضد د پاناما مقدمې د فیصلو په اورولو مشهور شو.
د نوي ګمارلي چیف جسټس اصف سعید کوسه په اړه د وکیلانو وینا ده چې هغه ښايي د عدلیې تقدس بحال کړي.
د قانوني چارو پوه شهاب الدین خټک وايي، د جسټس اصف سعید کوسه د عدالتي خدماتو یو تاریخ پروت دی.
دی وايي، د چیف جسټس میا ثاقب نثار په وخت کې پر عدلیې نیوکې کېدې، نو هیله ده چې کوسه به عدلیه غیر سیاسي کړي.
د قانوني چارو بل پوه نور عالم خان وايي، له کوسه څخه په عدلیې کې د اصلاحاتو هیله کوي.
اصف سعید کوسه د قانون په اړه څلور کتابونه لیکلي او د پاکستان په ځېنو پوهنتونونو کې استاد هم پاتې شوی دی.
