افغان ولسمشر اشرف غني په نړیوالو غږ کړی چې په افغانستان کې د نېږدې دوو لسیزو جګړی پای ته رسولو په هدف د سولې روانو مذاکراتو د بریالیتوب لپاره دې ورسره مرسته وکړي.
سېپټېمبر پر ۲۳ د ملګرو ملتونو جنرل اسمبلۍ ته د نوموړي له خوا په یو ثبت شوي تقریر کې نوموړي په نړیواله ټولنه غږ وکړ چې د یو خپلواکه او جمهوري افغانستان جوړولو لپاره دې ورسره مرسته وکړي.
افغان ولسمشر زیاته کړه حکومت یې له طالبانو سره د مخ په مخ خبرو لپاره ژمنه، جذبه او حوصله ښودلې ده خو یوازې دا به پوره نه وي.
ولسمشر غني وویل د اوږد مهاله سولې لپاره افغانستان باید د ترهګرۍ ستونزې جرړو ته ورسي.
په دوحه کې د افغانانو تر منځ مذاکرات د هغه پروسې برخه ده چې سږ کال د فبرورۍ په میاشت کې د امریکا او طالبانو تر منځ له سولې لوظنامې سره پیل شوې وه.
دا په داسې حال کې ده چې د امریکا ولسمشر ډونالد ټرمپ وایي، په افغانستان کې به جګړه پای ته ورسوي او ځواکونه به خپل هېواد ته ستانه کړي.
ټرمپ وایي، امریکا به د سولې راوستونکي هېواد په توګه خپل مسولیت پرځای او په افغانستان کې به جګړه پای ته ورسوي.
ډونالډ ټرمپ دغه خبرې د سېپټېمبر پر ۲۲مه د ملګروملتونو عمومي اسمبلۍ ته په وینا کې چې له مخکې ثبت شوې وه، وکړې.
ټرمپ وویل: "همدا اوس چې موږ خبرې کوو، امریکا هم پر دې کار کوي چې په افغانستان کې جګړه پای ته ورسوي او موږ خپل ځواکونه کور ته راستانه کړو. امریکا د سولې راوستونکي په توګه زموږ برخلیک ټاکي، خو دا سوله له یوه پیاوړي دریځه ده."
ولسمشر ټرمپ په افغانستان کې د ۱۹ کلنې جګړې د پای ته رسېدو لپاره دا ژمنه بیا داسې مهال تازه کوي چې په قطر کې د جګړې د دوو مهمو لورو، د افغانستان حکومت او طالبانو ترمنځ خبرې له څه باندې ۱۰ ورځو راهیسې پیل شوې دي.
