په ننګرهار کې د نړیوالو، ملي او سیمه ییزو رسنیو استازو د هلمند لپاره د ازادي راډيو د خبریال الیاس داعي پر وژل کېدو خواشیني وښوده.
دوی چې د نومبر پر ۱۳مه په جلالاباد کې په احتجاجي ډول راټول شوي وو، د جنګ پر ښکېلو خواوو یې نیوکه وکړه چې ګوندې د خبریال ژوند او د بیان ازادۍ ته درناوی نه لري.
په ختیځ کې د انعکاس خصوصي ټلوېزیون د خپرونو مسؤل شکرالله پاڅون د الیاس داعي وژل د بیان پر ازادۍ ګوزار بولي او زیاتوي چې د خبریال په وژلو خبر له منځه نه ځي او لسګونه نور داعیان شته چې د داعي لاره تعقیب کړي.
خبریالان د هېڅ چا نه دي، خو د هرچا لپاره دي او باید وژنه یې بنده شي.
پاڅون زیاته کړه: "له ښکېلو خواوو غواړم چې د خبریال ژوند ته پاملرنه وکړي، خبریال دې نه وژني، د خبریال په وژنه ستاسې لاسته هېڅ نه درځي، که داعي مو شهید کړ، بل داعي به راپورته کېږي، د ولس ستونزې به راپورته کوي، د ولس حقوق به له حکومت او ټولو خواوو غواړي."
د افغانستان د ژورنالېستانو د ملي ټولنې غړی شاه جهان جهاني وایي، خبریالان د مایک او قلم خاوندان دي او وژنه یې نه جبرانېدونکی او نه بښونکی عمل دی.
دی وايي: "د خدای په لحاظ! له موږ سره ښه چلند وکړئ، موږ مه وژنئ، موږ غریب یوو، موږ ژورنالېستان د دې ټولنې هغه قشر یوو چې له مایک او قلم څخه غیر بل څه نه لرو."
په دغو مراسمو کې په ختیځ کې د افغان خبریالانو د خوندیتوب ټولنې مشر شېرشاه همدرد وویل، خبریالان د هېڅ چا نه دي، خو د هرچا لپاره دي او باید وژنه یې بنده شي.
دی وایي، ټول ننګرهار مېشتي خبریالان د الیاس داعي وژنه غندي او دا کړنه یو بشري جنایت بولي.
دی زیاتوي: "خبریالان بې پرې خلک دي، د دوی د ژوند خوندیتابه ته باید پاملرنه وشي، د دوی وژل بشري جنایت دی، پوهېږو چې د خبریال په وژنه به غوغا ډېره جوړوي، خو دا کوم کرېډېټ نه دی، دا مظلومه طبقه، بې دفاع او بې وسلې خلک، ملکي وګړي او د دې ټولنې خادمین دي او دا خادمین مه وژنئ!"
الیاس داعي چې له تېرو ۱۲ کالو راهیسې په هلمند کې د ازادي راډيو استازی و چې تېره ورځ په مرکز لښکرګاه کې د مقناطیسي ماین د چاودنې له امله ووژل شو او د مجتبی محمدي په نوم یو ورور یې ټپي شو.
د هلمند د نادعلي ولسوالۍ اوسېدونکي الیاس داعي واده کړی و او د مهربان په نوم یوه یواځنۍ لور ترې پاتې شوه.
د نوموړي وژنه چې تردې دمه یې مسؤلیت چا په غاړه نه دی اخیستی، په کوردننه او بهر له بېلابېلو غبرګونو سره مخ او وغندل شوه.
خو په ختیځ کې د لیکوالو او ژورنالېستانو ټولنې مشر رحمت الله زیارمل بیا پر حکومت غږ کوي چې غلی پاتې نه شي او د خبریالانو وژونکي پیدا او مجازات کړي.
دی زیاتوي چې له خبریالانو سره د زور زیاتي پر وړاندې پڅ چلند د دې لامل شوی چې خبریالانو پروړاندې د تاوتریخوالي پېښې زیاتې شي.
دی وايي: "موږ له حکومته غواړو چې د ټولو هغو خبریالانو چې د بیان د ازادۍ، خوندیتوب او د خلکو د خدمت په چوپړ کې خپل ژوند بایللی، قاتلین یې پیدا او قانون ته وسپاري او د دغو مرموزو ځنځیري وژنو لړۍ دې نوره ودرول شي."
په هلمند کې د ازادي راډيو خبریال الیاس داعي په داسې حال کې وژل کېږي له دې څو ورځې وړاندې په کابل کې د طلوع ټلوېزیون پخوانی خبریال یما سیاوش هم په یوه مقناطسي بم چاودنه کې له درېيو نورو کسانو سره ووژل شو.
د فېسبوک تبصرې