د پاکستان پلازمېنې اسلام اباد ته نژدې د پنجاب صوبې په مري کې د زیاتې واورې او یخنۍ له امله د مړو سېلانیانو شمېر لږ تر لږه ۲۲ ته رسېدلی دی.
د ژغورنې ادارې یا ریسکیو ۲۲۱۱ د جنورۍ پر اتمه په یو خبرپاڼه کې ویلي چې مړه شوي هغه کسان دي چې د زیاتې واورې له امله په خپلو موټرو کې ایسار پاتې شوي او هلته یې د زیاتې یخنۍ له کبله ژوند له لاسه ورکړی دی.
د یادې ادارې په وینا، په مړو کې ۱۰ ماشومان، دوې ښځې او ۱۰ سړي شامل دي. په دې کې د اسلام اباد پوليسو يو سب انسپکټر پشمول د کورنۍ اووه غړي هم شامل دي.
د مړو شويو کسانو جسدونه له مري څخه اسلام اباد او راولپېنډۍ ته منتقل شوي دي.
د پنجاب اعلا وزير عثمان بزدار د جنورۍ پر اتمه پر ټويټر ليکلي چې په مري کې ګېر شوي ټولې کورنۍ سرکاري ودانیو او هوټلونو ته رسول شوې دي.
د ده په وینا، د پوليس له معلوماتو سره سم، د جنورۍ پر اوومه د شپي ۳۳،۷۴۵ ګاډي موجود وو چې ۳۳،۳۷۳ را اېستل شوي دي.
د پاکستان د کورنو چارو وفاقي وزير شيخ رشيد احمد د جنورۍ پر اتمه سرکاري ټيلیويژن ته وويل چې د خلکو ژغورني عملياتو کې پوځ، له قدرتي افتونو سره د مبارزې ادارې کارکونکي، پوليس او ځايي انتظاميه برخه اخلي.
د شېخ رشید په وینا، په مري کې اوس حالات تر کنټرول لاندې دي.
د پاکستان د اطلاعاتو او خپرونو وفاقي وزير فواد چودري ويلي دي چې له مري څخه تلونکې لار د ګاډو تګ لپاره پرانستل شوې ده.
فواد چودري پر ټويټر ليکلي چې د مري په ځينو سيمو کې مشکلات دي او د بجلۍ نظام د بحالولو لپاره هم کار روان دي.
د حکومت مخالف ګوندونو په لړ کې د مسلم ليګ نواز مشر شهباز شريف، د پيپلز پارټۍ مشر بلاول بوټو زرداري او نورو د مري پر پيښه خواشيني څرګنده کړې ده او پر حکومت یې نیوکې کړې دي.
وزيراعظم عمران خان د دې پېښي په اړه د پلټنو امر کړی دی.
بلخوا د خيبر پښتونخوا اعلا وزير په ګليات کې د ګاډو په ورتګ بنديز لګولي دی.
د اعلا وزير له دفتره خپور شوي بيان کې راغلي چې په ګليات کې موجود ټول سيلانیان هوټلونو ته منتقل کړل شوي دي او اړونده ادارو ته يې د بيدار اويسدو امر کړی دی.
د پاکستان د هوا پېژندنې ادارې په وينا، په دې هېواد کې به د روانو واورو او بارانونو لړۍ د جنورۍ تر نهمې دوام ولري.
که څه هم له بلوچستانه تر دې دمه د بارانونو او د واورو د ورښت له کبله د مرګ ژوبلې راپورونه نه دي ورکړل شوي خو په ګوادر او کیچ ضلعو کې کورونه د باران اوبو اغېزمن کړي او سلګونه کسان یې اړ کړي چې خپل کورونه پرېږدي.
د بلوچستان چارواکي وايي چې د اغېزمنو شویو سیمو خلکو سره د مرستو لپاره یې کار پیل کړی دی.
د پاکستان د نورو برخو په شان په خيبر پښتونخوا کې هم له شاوخوا پينځو ورځو راهيسې د واورو او بارانونو لړۍ روانه ده.
د قدرتي افتونو د نظم صوبايي ادارې په وينا په غرييزو سيمو کې د واورو او بارانونو له کبله لويې لارې بندې شوې چې دوی يې د بيا پرانيستلو هلې ځلې پيل کړې دي.
بلخوا د بره دير ډپټي کمېشنر محمد شعیب خان د جنورۍ پر اوومه مشال راډيو ته وويل چې هلته له واورو او بارانونو سره تړليو پېښو کې شپږ کسان مړه شوي او ځينې نور ژوبل شوي دي. د نوموړي په وينا، يو شمېر ودانيو ته هم زيان رسېدلی دی.
د بره دیر اوسېدونکو د جنورۍ پر اوومه مشال راډيو ته ويلي چې د واورو له کبله يو شمېر لارې او سړکونه هم تړل شوي دي.
د قدرتي افتونو سره د مبارزې اداره وايي، په غريیزو سیمو کې د لارو پرانيستلو لپاره هلې ځلې کوي او د امدادي کارونو لپاره د ضلعو ډپټي کمېشنرانو ته پیسې ورکړل شوي دي. یادې ادارې پر ولس هم غږ کړی چې د مرستو لپاره دې په خپلو خپلو ضلعو کې د متعلقه چارواکو سره تماس ونیسي.
د پاکستان د هوا پېژندنې ادارې په وينا، په دې هېواد کې به د روانو واورو او بارانونو لړۍ د جنورۍ تر نهمې پورې دوام ولري.
په عين حال کې د خيبر پښتونخوا د قدرتي افتونود نظم ادارې ويلي چې اغېزمن کسان د اړينو مرستو لپاره پر ۱۷۰۰ شمېره باندې په وړيا ډول زنګ وهلی شي.
