د خیبر پښتونخوا د روغتیا ادارې پخلی کړی چې په بنو کې یو ماشوم د پولیو یا ګوزڼ وایرس ځپلی دی.
په پاکستان کې د پوليو د مخنيوي چارواکي وايي، سږکال ( ۲۰۲۳ز) په پاکستان کې د پوليو ناورغۍ دا لومړۍ پېښه ده. په ۲۰۲۲ز کال کې په ټول پاکستان کې د پوليو ۲۰ کیسونه رپورټ شوي ول چې ۱۷ یې یوازې په شمالي وزیرستان کې وو. د پولیو دوه کېسونه په لکي مروت او یو په جنوبي وزیرستان کې رپورټ شوی وو.
د بنو د صحت څانګې وياند نعمان خان د مارچ پر ۱۷مه مشال ریډیو ته وویل چې د بنو په بکاخیلو کې يو درې کلن ماشوم د ګوزڼ ناروغۍ وهلی دی.
نعمان وویل چې په سیمه کې د پولیو ناروغۍ د مخنیوي لپاره ماشومانو ته د پولیو ضد څاڅکو ورکولو کمپاينونونه يې تيز کړي دي چې دارنګ د دې ناورغۍ مخنيوی وشي.
په شمالي وزیرستان کې د فبرورۍ له ۱۳مې تر ۱۵مې د پوليو ضد واکسینو کمپاين چلول شوی وو. هغه مهال د شمالي وزیرستان ډپټي کمشنر ریحان ګل خټک مشال راډیو ته ویلي وو چې په هغه کمپاین کې د ضلعې يو لاک او دوه څلوېښت زره هغو ماشومانو ته د پوليو یا ګوزڼ د مخنیوي څاڅکي ورکړل شوي چې عمرونه یې له پنځو کلونو کم وي.
د نوموړي په وینا هغه کمپاين د ۶۲۱ روغتيايي ډلو په مټ تر سره شوی وو چې د امنیت لپاره یې کوټلي اقدامات شوي وو. خټک د سیمې له علماوو، مدني ټولنو او قبایلي مشرانو غوښتنه کړې وه چې د پوليو ټيمونو ملاتړ دې وکړي.
پاکستان او افغانستان د نړۍ هغه یوازیني هېوادونه دي چې پکې د پولیو یا ګوزڼ وایرس لا هم موجود دی.
په افغانستان کې د مارچ پر ۱۳مه د پوليو وايرس د مخنيوي لپاره څلور ورځنی د واکسينو کمپاين پیل شوی وو. په افغانستان کې سږکال تراوسه پورې د پوليو هېڅ يوه پېښه نه ثبت شوې البته تېرکال يوازې دوه ماشومان چې پکې يو په کونړ او بل په پکتيکا ولایتونو کې وو، په وايرس اخته شوي ول
