د پاکستان د بیمو چارو حکومتي ادارې (سټېټ لایف انشورنس کارپورېشن) د خیبر پښتونخوا حکومت له لوري د پیسو نه ورکولو له کبله په هغه صوبه کې د صحت کارډ له لارې د ناروغانو د وړیا درملنې چارې ځنډولې دي.
هغې ادارې د اپرېل پر ۱۹مه د صوبې هغو ټولو حکومتي او شخصي روغتونونو ته لیک استولی دی چې په صحت کارډ خلکو ته د درملنې خدمات ورکوي.
د پاکستان د بیمو چارو تر ټولو لویې ادارې روغتونونو ته ویلي دي چې د اپرېل له ۲۰مې څخه دې په صحت کارډ د ناروغانو مفتې معاینې او علاج نه کوي.
د خیبر پښتونخوا د عامې روغتیا لنډمهالي سلاکار عابد مجید د اپرېل پر ۲۰مه مشال راډیو ته وویل، حکومت باید هره میاشت د صحت کارډ پروګرام لپاره ۴.۸ اربه (مېلیارده) روپۍ ورکړي چې د مالي بحران له کبله یې نه لري.
د هغې بیمې یوشمېر کارکوونکو له مشال راډیو سره د خبرو پر وخت له نګران حکومته غوښتنه وکړه چې ژرترژره مسله هواره کړي.
خو د خیبر پښتونخوا صوبه له اوږدې مودې راهیسې د مالي بحران ښکار ده. د هغې صوبې پخواني اعلاوزیر محمود خان د تېر کال په نومبر کې تور پورې کړی وو چې وفاقي حکومت ورته د برېښنا او ګیس د ګټې پیسې او د قامي مالیاتي کمېشن (اېن اېف سي) په پیسو کې خپله برخه نه ورکوي. په هغه وخت کې وفاقي حکومت د نوموړي تور رد کړی وو او دعوه یې کړې وه چې صوبه د ناسمو حکومتي تګلارو له کبله له مالي بحران سره مخامخ ده.
د ۲۰۲۳ز کال په جنورۍ کې چې د خیبر پښتونخوا اسمبلي ړنګه شوه نو لنډمهالي حکومت هم په تېرو میاشتو کې په بیا بیا ویلي دي چې صوبه له لویو مالي مشکلاتو سره مخامخ ده. همدا لامل دی چې لنډمهالي حکومت د اپرېل پر ۱۳مه وویل چې په خزانه کې د کافي پیسو نه شتوالي له کبله تر اختر مخکې سرکاري کارکوونکو ته د روانې میاشت تنخاګانې نه شي ورکولای.
د پاکستان تحریک انصاف صوبايي حکومت په ۲۰۱۶ز کال کې په خیبر پښتونخوا کې د صحت کارډ په نوم د بیمې له لارې د محدودې درملنې پروګرام پیل کړی وو چې بیا د هم هغه ګوند وزیراعظم عمران خان د ۲۰۲۰ز کال په پای کې وغځاوه.
له دې سره سم، د خیبر پښتونخوا بې وزله اوسېدونکي د صحت کارډ په ذریعه تر ۱۰ لکه روپیو پورې وړیا روغتیايي خدمات ترلاسه کولای شي.
د صحت کارډ ووبپاڼه وايي، په خیبر پښتونخوا کې ۷۲ لکه کورنۍ د هغې بیمې له لارې د روغتیا مفتو اسانتیاوو ته لاسرسی لري او د بیمې د پروګرام کلنی لګښت شاوخوا ۱۸ اربه روپۍ دی.
