د خیبر پښتونخوا په بنو کې د فبروۍ اتمې د عامو انتخاباتو یو نوماند د کور مخې ته چاودنه شوې ده چې د پولیسو په وینا پکې دوه تنه ژوبل شوي دي.
د سټي یا ښار تاڼېدار محمد بلال خان مشال راډیو ته وویل چې چاودنه د جنورۍ ۲۸مې پر مازیګر په بازار کې د صوبايي اسمبلۍ ۱۰۱مې حلقې څوکۍ ته د نوماند ملک شاه محمد خان د کور مخې ته شوې ده چې پکې نوموړي ته زیان نه دی اوښتی خو دوه ولسي وګړي برسېرن ټپي شوي دي.
دی وايي، چوونکي مواد د کور مخې ته په ولاړ موټرسایکل کې ایښي ول.
شاه محمد خان د تحریک انصاف ګوند سیاستوال دی چې په تېر صوبايي حکومت کې وزیر وو.
د نوموړي د کور مخې ته د چاودنې ذمه واري چا نه ده منلې خو پولیس زیاتوي چې پلټنې یې پیل کړې دي.
