په افغانستان کې د طالبانو د حکومت کورنیو چارو وزارت وایي، په هرات ولایت کې یوه کس پر لمونځ کوونکو ډزې کړي، ۶ کسان یې وژلي او يو یې ټپي کړی دی.
د دغه وزارت ویاند عبدالمتین قانع پر خپله ایکس پاڼه (پخواني ټویټر) لیکلي چې پېښه د اپريل پر ۲۹مه، ماخست مهال د ګذرې ولسوالۍ په شهرک سیمه کې شوې. هغه په دې اړه نور تفصيل نه دی ورکړی.
په افغانستان کې د ملګرو ملتونو مرستندویه ادارې (یوناما) او پاکستان هغه برید غندلی دی.
یوناما د اپرېل پر ۳۰مه، پر اېکس خپاره کړې بیان کې زیاته کړې چې په افغانستان کې د شيعه وګړو خوندي ساتلو او پر هغوی د بریدونو د تحقیقاتو او بریدګرو ته د سزاو ضرورت دی.
د پاکستان د بهرنیو چارو وزارت هم د مې پر لومړۍ نېټه پر اېکس په بیان کې ویلي دي چې په "سختو ټکو کې په جومات کې ترهګر برید" غندي.
اسلام اباد داراز، په بیان کې په پېښه کې د وژل شویو او ژوبلو له کورنیو سره خواخوږي ښوولې ده.
د هرات ولایت ځینو رسنیو ويلي چې برید د امام زمان په نوم جومات کې شوی چې د شیعه مذهبو اړوند دی.
د اسلامي دولت (داعش) ډلې د اپرېل پر ۳۰مه شپې مهال پر ټېلېګرام په بیان کې د حملې ذمه واري ومنله.
