د خیبر پښتونخوا کوز جنوبي وزیرستان کې په بمي چاودنه کې دوه کسان وژل شوي او درې ژوبل دي.
د سیمې خلکو مشال راډیو ته وویل چې د جولای پر ۱۹مه په واڼه بازار کې د "ښو طالبانو" کمانډر عین الله پر ګاډي بمي چاودنه شوې چې پکې د سیمې خلکو ته مرګژوبله واوښته.
په پاکستان کې د "ښو طالبانو" اصطلاح د هغو وسلوالو لپاره کارول کېږي چې يا خو پوځ ته تسليم شوي وي يا د هغوی مخالف نه وي.
د واڼه تاڼې محرر ضیاالرحمان مشال راډیو ته وویل چې برید کونکو چاودېدونکي توکي په موټر سایکل کې ځای پر ځای کړي ول. هغه وویل د پېښې مقدمه یې د نامعلومه کسانو په خلاف لیکلې ده.
د برید ذمه واري تر دې دمه چا نه ده منلې.
د کوز سویلي وزیرستان یو مشر ایاز وزیر مشال راډیو ته وویل چې په سیمه کې بمي چاودنې او هدفي وژنې روانې دي او حکومتي چارواکي یې د مخنیوي لپاره څه هم نه کوي.
خو د سویلي وزیرستان انتظامیه چارواکو مشال راډیو ته ویلي دي چې پوځ او پولیس په سیمه کې د امن لپاره کار کوي.
