د کراچۍ پولیسو د پښتون ژغورنې غورځنګ (پي ټي اېم) یو غړی هدایت الله پشتین نیولی دی.
د کراچۍ ارټلري میدان تاڼیدار سجاد علي مشال راډیو ته وویل چې ویلي چې د پي ټي اېم مشرانو او پلویانو د کراچۍ پریس کلب مخې ته د احتجاج په مهال د ریاستي ادارو په خلاف نعرې وهلې وې او د خلکو د پارولو هڅه یې کړې وه نو ځکه یې ورباندې مقدمه دایره کړې ده.
پولیسو د جولای پر ۲۰ عدالت ته وړاندې کړ او محکمې هغه د نورو پلټنو لپاره په دوه ورځني ریمانډ پولیسو ته سپارلی دی.
دا په داسې حال کې ده چې د جولای پر اوومه پي ټي اېم د حکومت له لوري اعلان شویو عملیاتو "عزم استحکام" ضد مظاهره کړې وه. د پي ټي اېم مشرانو ویلي چې د دوی مظاهره پرامنه وه، خو بیا هم پولیس د دوی پر ضد مقدمې درج کوي.
د پي ټي اېم وکيلې منيزه کاکړې مشال راډیو ته وویل، پولیسو د مظاهرې تابیا کونکو هدایت الله پشتین، رویدالله، مصطفا کمال ترڅنګ د مظاهرې پر ۳۵۰ ګډونوالو مقدمه لیکلې ده.
د پي ټي اېم کراچۍ ویاند رويد الله وویل چې دوی د پښتنو د حقونو لپاره پرامنه مبارزه کوي، خو پر وینا یې پولیس یې پر ضد په دروغو مقدمې جوړوي.
د پي ټي ایم چارواکي وایي، هدایت الله پشتین د جولای پر ۱۸مه نیول شوی وو خو دوه ورځې وروسته پولیسو هغه عدالت ته وړاندې کړ.
