د کورمې د لارو بندیدو له وجې په پېښور کې پر ایسارو کورميوالو څه تيرېږي؟
د کورمې او پېښور ترمینځ د لارو تړل کېدو له وجې سلګونه خلک د میاشتو راهیسې په پېښور کې ایسار دي. په دوی کې زیاتره یا خو مریضان دي چې د درملنې لپاره پېښور ته ورغلي ول او لارې پرې بندې شوې او یا هغه خلک دي چې له مساپرۍ د رخصتۍ لپاره کورمې ته تلل خو د سړکونو بندېدو له وجې په پېښور کې ایسار شول. په دې خلکو کې ښځې او ماشومان هم دي. په کورمه کې د سنیانو او شیعه ګانو ترمینځ د نښتو له وجې د تېر کال له نومبر راهیسې لارې تړل شوي دي. حکومت وایي لارې تر هغې نه پرانیزي چې په نښتو کې ښکیلو ډلو ورته وسلې نه وي سپارلې. د وسیم سجاد ویډیو.