د پاکستان لنډمهالي حکومت د مارچ له لومړۍ څخه د پېټرولو د بیو لوړولو اعلان کړی دی.
د مالیې وزارت د فبرورۍ پر ۲۹مه په بیان کې ویلي دي چې د یو لیټر پېټرولو نرخ څه باندې څلور روپۍ لوړوي چې ورسره یې نوې بیه څه کم ۲۸۰ روپۍ ته رسېدلې ده.
د مالیې وزارت ویلي دي چې د ډیزلو په بیه کې بدلون نه راولي او یو لیټر به یې د پخوا په څېر په څه باندې ۲۸۸ روپۍ خرڅېږي.
بیان زیاتوي چې د تېلو دا بیې به د مارچ تر نیمايي پورې عملي وي.
دا په داسې حال کې ده چې د پاکستان د مالیې وزارت د فبرورۍ په پیل او بیا په نیمايي کې هم د پېټرولو او ډیزلو بیې لوړې کړې وې.
تر دې مخکې حکومت د جنورۍ له ۱۶مې څخه د میاشتې تر پای پورې د یو لیټر پېټرولو نرخ اته روپۍ کم کړی وو خو د ډیزلو هغه یې پر ځای ساتلی وو.
پاکستان د پیسو د نړیوال صندوق (ای اېم اېف) د پور د شرطونو پوره کولو لپاره په پړاوونو کې د برېښنا، تېلو او ګیس په بیو کې دولتي رعایت ختمولو ته دوام ورکړی دی چې ورسره د انرژۍ بیې خورا لوړې شوې چې پرضد یې خلکو او ګوندونو مظاهرې هم کړې وې.
