په افغانستان کې د طالبانو حکومت د زده کړو په برخه کې فعال احمد فهیم عظیمي خوشې کړی دی.
د بخښنې نړیوال سازمان (ایمنسټي انټرنیشنل) د سېپټېمبر پر ۲۶ مه پر اېکس لیکلي دي چې نوموړی تر څه باندې ۱۱ میاشتني بند وروسته خوشې شوی دی.
سازمان ویلي دي چې عظیمي باید هېڅکله د نجونو د زده کړو د حقونو ملاتړ په خاطر زنداني شوی نه وای.
د هغه ورور احمد فواد عظیمي د سېپټېمبر ۲۶مې پر ماښام مشال راډیو ته وویل، "زما ورور احمد فهیم عظیمي د محکمې په وروستۍ قضايي جلسه کې د محکمې د حکم له مخې خوشې شو. هغه شاوخوا ۱۱ میاشتې او ۲۰ ورځې په بند کې تېرې کړې، خو الحمدلله، د خدای شکر دی، چې خوشې شو او اوس له خپلې کورنۍ سره دی."
د طالبانو حکومت لا د نوموړي د خوشې کولو په اړه څه نه دي ویلي.
عظیمي د ۲۰۲۳ز کال په اکتوبر کې د طالبانو د حکومت پرضد د کړنو په تور نیول شوی وو او سږ کال په اپرېل کې ورته په غیاب کې د یو کال بند سزا هم اورولې وه چې هغه و نه منله او د استیناف (لوړ عدالت) غوښتنه یې وکړه.
د طالبانو حکومت په وروستیو کلونو کې د ګڼو فعالانو، خبریالانو او نورو کسانو نیول او ځورول پیل کړي دي، او پر ځینو د جاسوسۍ او حکومت د پالیسۍ د مخالفت تورونه لګولي دي.
د ۲۰۲۳ ز کال په مارچ کې د طالبانو حکومت په کابل کې د تعليمي چارو فعال او د "قلم لار ټولنې" بنسټګر مشر مطیع الله ویسا ونيو چې بیا یې تر اووه میاشتو بند وروسته یې خوشې کړ.
طالبان د ۲۰۲۱ز کال د اګست پر ۱۵مه پر افغانستان واکمن شول او له هغه راهیسې یې تر شپږم ټولګي پورته د نجونو پر تعلیم او د ښځو پر کار بندیزونه او محدوديتونو لګولي دي.
د طالبانو حکومت وايي چې د نجونو د زدکړو لپاره پر یوه تګلاره او د مناسب چاپېریال پر جوړولو کار کوي، خو تر اوسه یې دا نه دي ویلي چې په تېرو درو کلونو کې یې په دې برخه کې څومره پرمختګ کړی دی.
