د جنوبي وزيرستان په مکين کې ځايي خلکو د ماين په چاودنه کې د درې ماشومانو د وژنې د پېښې پرضد پرلت وهلی دی.
د جون په لومړۍ نېټه د تحصيل لده تنګه بادنزۍ کې شوې چاودنه کې درې ماشومان وژل شوي او دوه زخميان ول.
د پرلت ګډونوال او پښتون ژغورنې غورځنګ يو مخکښ عالمزېب مسيد بېګاه مشال رېديو ته وویل چې په لومړي ځل په ځمکنيو ماینونو کې د وژل شویو لپاره احتجاج کوي او په پرلت کې يې د هغو ماشومانو مړي هم اېښي دي چې ماین چاودنه کې وژل شوي دي.
نوموړی وايي چې د دوی ولس د ماین چادونو ډېر کړولی دی، دوی ورته د انصاف غوښتنو لپاره راوتلي دي.
دی زیاتوي چې یوازې د مسیدو په علاقه کې ۱۱۸مه پېښه ده چې پکې تر ۳۰۰ زیات، ماشومان، ښځې او سړي ټپیان شوي دي او د راټول کړیو مالوماتو له مخې ۲۵ تنه پکې وژل شوي دي.
عالمزېب مسید وايي، د دې لپاره یې پرلت وهلی دی چې د ماین پاکۍ ټيمونه یې سیمې ته ولاړ شي او ماینونه پاک کړي.
په دې پېښو کې د وژل شویو کسانو لپاره دې د پنجاب په شان شهدا پېکېج ورکړل شي. یاده دې وي چې په پنجاب کې د تېلو ټانکر چاودنې قربانیانو کورنیو لپاره حکومت پیسې اعلان کړې وې. بل د دوی په سیمو کې بره پر کورونو ډرون نه الوزول کېږي، د کلیو په مینځ کې امنیتي پوستې دې ختمې کړل شي.
خود جنوبي وزيرستان ډپتي کمشنر خالد اقبال بېګاه مشال رېډیو ته وويل چې حکومت له پرلتوالو سره خبرې اترې کړي او د هغو ټولې غوښتنې يې منلې دي خو د ده په خبره د دې سربېره هم هغو احتجاج ته دوام ورکړی.
د جنوبي وزيرستان په بېلا بېلو سیمو کې د ترهګرۍ ضد جګړې پر مهال ماينونه ښخ کړل شوي چې د چاودنو له وجې ګڼ شمېر کسانو ته مرګ ژوبله اوښتې او معذوره شوي دي چې پکې زیاتره ماشومان دي.
