په پاکستان کې چارواکي وايي، د راجسټرډ شویو افغان کډوالو د اوسېدو موده د جون تر ۳۰مې غځول شوې ده او واپسي به یې په درېیمه مرحله کې کېږي.
دا فيصله د اپريل پر ۲۶مه د وزيراعظم شهباز شريف په مشرۍ کې د مرکزي کابيني په غونډه کې وشوه. له غونډې وروسته د خپور شوي يو بيان ترمخه دا توسيع د قبایلو او د سرحدونو د چارو وزارت (سيفران) په وړانديز شوېده.
د کډوالو لپاره د ملګرو ملتونو اداره (یو این ایچ سي ار) وايي دا وخت په پاکستان کې شاوخوا ۱۳ لاکه رجسټرډ افغان کډوال موجود دي.
کابينې ته ويل شوي هغه افغانان چې «پي. او. ار.» یا د پاکستان د حکومت لخوا ورکړل شوي د شناخت ځانګړي کارتونه لري د پاکستان په سکولونو کې داخلو، بینکي کاتو یا اکاونټونو او نورو سهولتونو څخه ګته پورته کولی شي. په پاکستان کې د مېشتو پي او ار لرونکیو کډوالو د کارتونو قانوني موده د ۲۰۲۴ز کال د مارچ پر ۳۱مه پای ته رسېدلې وه.
د بیان له مخې د یادو کارتونو درلودونکي افغان کډوال به وروسته له هغې خپل هیواد ته لېږل کېږي چې لومړی د بې اسناده افغانانانو د ویستلو بهیر ختم شي. په بيان کې وړاندې راغلي چې له پاکستانه د بې اسناده بهرنیانو د ویستلو بهیر روان دی. خو د هغې پروسې د بشپړیدو لپاره کومه حتمي نېټه نه ده ښودل شوې.
پاکستان په داسي وخت کې د راجسترډ کډوالو په موده کې توسيع کړېده چې بل لوري ته د افغان سیټيزن کارتونو لرونکو کسانو واپسي هم دوام لري. د يو اين ايچ سي ار شمېرې ښيي چې په پاکستان کې دا وخت د هغو کارتونو لرونکو افغانانو شمير شاوخوا ۸۸۰،۰۰۰ دی.
د پاکستان تېر لنډ مهالي حکومت د ۲۰۲۳م کال د اکتوبر په مياشت کې د بي اسناده افغانانو د واپس ليږلو پلان اعلان کړ.
بل پلو، د بخښنې نړیوال سازمان ویلي، له پاکستانه د لکونو اسناد لرونکو افغانانو د ایستلو پرېکړه د هغوی ژوند خطر کې اچوي.
ایمنسټي انټرنېشنل د اپرېل پر څلورمه په بیان کې د هغه سازمان د مهاجرینو د حقونو د چارواکي جېمز جینیون له خولې ليکلي چې د اسناد لرونکو کډوالو د ایستلو په اړه "هغه پرېکړه په ټول پاکستان کې د ۸۰۰،۰۰۰ افغان کډوالو ژوند په خطر کې اچوي." یاد سازمان د پاکستان پر حکومت غږ کړی وو چې د افغان کډوالو د "غیر قانوني اخراج" د مخنیوي لپاره د نړیوالو غوښتنې له پامه نه غورځوي.
