د پاکستان د سیند صوبې د حیدراباد ښار په پریټ اباد کې، د ګیس سلېنډر چاودنې پینځه تنه وژلي او ۵۰ نور یې ژوبل کړي دي.
د حیدراباد پولیسو مشر، اېس اېس پي ډاکټر فرخ رضا خبریالانو ته وویل چې چاودنه د مې پر ۳۰مه، د سیمې په یو دوکان کې شوې ده. په ژوبلو کې ښځې او ماشومان هم شامل دي چې په روغتونو کې تر درملنې لاندې دي.
د چاودنې او اور لګېدنې له امله نېږدې ودانۍ هم زیانمنې شوې دي.
د سیند اعلا وزیر مراد علي شاه او ګورنر کامران ټیسوري په کراچۍ کې د سېول او پټېل روغتونونو ته لاړل او د سوځېدلو کسانو لیدنه یې وکړه.
مراد علي شاه له رسنیو سره په خبرو کې وویل چې د ۲۷ ټپیانو روغتیایي حالت ښه نه دی او زیاته یې کړه چې د پېښې په اړه یې یوه کمېټه هم جوړه کړې ده چې بشپړ پلټنه به کوي.
د کراچۍ د سېول او پټېل روغتونونو ډاکټران وايي، ښايي د مړو شمېر نور هم زیات شي، ځکه ګڼ زخمیان ډېرسوځېدلي دي.
په پاکستان کې تر دې مخکې هم دا ډول چاودنې شوي چې مرګژوبله یې اړولې وه. د مارچ پر ۱۳مه په کوټه کې د ګیس سلېنډر د چاودېدو له امله درې کسان وژل شوي ول. تر هغې مخکې د فبرورۍ پر۱۶مه، د پېښور په ګلبهار کې ورته چاودنې درې کسان وژلي ول.
