په اسلام اباد کې د امریکا سفیر ډونالډ بلوم د پاکستان حکومت لخوا په هغه هېواد کې د راجسټر افغان کډوالو د استوګنې مودې غځولو پرېکړه ستایلې ده.
سفارت د اګست پر نهمه په یو بیان کې وویل چې سفیر بلوم دا څرګندونې په اسلام اباد کې یوه ورځ مخکې د ریاستونو او سرحدي سیمو وزیر امیر مقام سره د لیدنې پر مهال کړې دي.
نوموړي په دې لیدنه کې وویل چې پاکستان "د افغان کډوالو د کوربتوب اوږد تاریخ لري" او د دې لپاره یې د حکومت مننه وکړه.
په اعلامیه کې د امریکا سفارت ویاند جوناتن لالي ویلي چې بلوم وویل چې د پاکستان سره په ګډه همکاري کوي ترڅو وړ افغانان په خوندي او موثره توګه په امریکا کې مېشت شي.
پاکستان ته د افغان کډوالو د ورتګ لړۍ په ۱۹۸۰زکال کې پيل شوه خو وروسته د کورنیو جګړو پر مهال هم هغه هېواد ته لکونه کډوال ورغلل.
پاکستان ته د کډوالو وروستۍ څپه تر هغې وروسته ورغله چې د ۲۰۲۱ز کال په اګست کې طالبان پر افغانستان واکمن شول.
د کډوالو لپاره د ملګرو ملتونو ادارې د ارقامو له مخې، دا مهال په پاکستان کې ۱۴ لاکه راجسټر افغان کډوال مېشت دي. دوی د پاکستان حکومت د اوسېدو لپاره ځانګړي کارډونه ورکړي دي. په وروستیو کې د پاکستان حکومت د هغو کډوالو د اوسېدو موده د ۲۰۲۵ کال د جون تر ۳۰مې غځولې ده.
د دې ترڅنګ په هغه هېواد کې داسې کډوال هم ژوند کوي چې د استوګنې هغه کارډونه نه لري.
د پاکستان نګران حکومت د ۲۰۲۳ز کال په اکتوبر کې بې اسناده بهرنیانو ته د اکتوبر تر ۳۱مې په خوښه د وتلو ویلي ول. د تېر کال د نومبر له لومړۍ راهیسې د افغانانو په زور د ایستلو بهیر پیل شوی چې لا هم دوام لري.
د پاکستان د سرکاري راډیو تر مخه، د ۲۰۲۴ کال د اګست تر څلورمې ۶۷۵،۱۹۰ افغانان خپل هېواد ته ستانه شوي دي.
