په پاکستان کې درو حکومت مخالفه ګوندونو تحریک انصاف، پښتونخوا ملي عوامي ګوند او جمعیت علمای اسلام (ف) له حکومته غوښتي دي چې له افغانستان سره دې د سوداګرۍ لپاره ټولې لارې پرانیزي.
د تحریک انصاف مخکښ اسد قیصر د جون پر ۲۷مه په قامي اسمبلۍ کې د وینا پر مهال وویل چې د سوداګریزو لارو بندېدو له وجې بې روزګاري زیاتېږي او اندېښنه ده چې ځوانان له وسلوالو ډلو سره ملګري شي.
د هغه په وینا، د ترهګرۍ د زیاتېدو وجه د پاکستاني حکومت دا ډول خرابې تګلارې دي چې ځوانان د ناامنیو خوا ته بیایي.
تر دې یوه ورځ مخکې د پښتونخوا ملي عوامي ګوند مشر محمود خان اڅکزي او د جمعیت علمای اسلام (ف) مشر مولانا فضل الرحمان په قامي اسمبلۍ کې د وینا پر وخت وویل چې د چمن او انګور اډې لارې باید سمدستي خلاصې شي.
مولانا فضل الرحمان دعوه وکړه چې د چمن پرلتوال دومره غریب شوي دي چې د کور د ښځو ګاڼې خرڅوي خو حکومت ورباندې سترګې پټې او غوږونه کاڼه کړي دي.
دا په داسې حال کې ده چې د پاکستان پخواني لنډمهالي حکومت د ۲۰۲۳ز کال په اکتوبر کې اعلان وکړ چې د نومبر له پیل څخه له افغانستان سره د تګ راتګ لپاره د پاسپورټ او ویزې لرل لازمي کوي.
د دې په غبرګون کې خلکو په چمن او انګور اډه کې احتجاجي پرلت وواهه چې له اتو میاشتو راهیسې روان دی او هغه لارې تړلې دي.
احتجاجیان وايي چې حکومت دې ورته د پخوا په څېر په تذکره او شناختي کارډ د تګ راتګ اجازه ورکړي ځکه چې نوي سفري مقررات یې د ډېورنډ کرښې دواړو خواوو ته کاروبارونه او ورځنۍ مزدوري اغېزمنوي.
خو حکومت دا غوښتنه ردوي او وايي چې د امنیت ساتلو لپاره ضروري ده چې هر سفر کوونکی پاسپورټ او ویزه ولري.
