په شمالي وزیرستان کې وسله والو د موبایل ټېلېفونونو دوکان پر مالکانو برید کړی دی چې پکې دوه کسان ژوبل شوي دي.
د میرلي د تاڼې یوه چارواکي د جولای پر ۳۱مه شپې ناوخته د نوم نه ښوولو په شرط مشال راډیو ته وویل چې وسله والو ماخوستن مهال د موبایل ټېلېفونونو دوکان مالکان وویشتل او یو کس یې له ځانه سره وتښتاوه.
دی وايي، ژوبل کسان کاشف الله او رسول نومېږي چې د میرلي د حسوخېلو اوسېدونکي دي. د پولیسو په خبره، تښتول شوی کس عاطف نومېږي.
د حملې او تښتونې ذمه واري چا نه ده منلې.
دا برید پر داسې مهال شوی چې په شمالي وزیرستان کې د ناامنیو پېښې زیاتې شوې دي.
د جولای ۳۱مې له حملې سره په شمالي وزیرستان کې د سږنیو هدفي بریدونو شمېر ۳۷ ته لوړ شوی دی چې پکې د قبایلي مشرانو، حکومتي کارکوونکو او سرتېرو په ګډون لسګونه کسانو ته مرګ ژوبله اوښتې ده.
تر دې مخکې د جولای پر ۲۸مه وسله والو په میرامشا کې دوه ملکان ووژل. تېر کال په هغه قبایلي ضلع کې ۴۶ هدفي بریدونه شوي ول.
د پاکستان پوځ د ۲۰۱۴ز کال په نیمايي کې په شمالي وزیرستان کې عملیات پیل کړل چې تر ۲۰۱۶ز کال پورې روان ول.
د عملیاتو له وجې تر یو میلیون زیات خلک کډوال شول چې زیاتره یې په پړاوونو کې خپلو کلیو او کورونو ته ستانه شوي دي.
د ۲۰۱۸ز کال په پای کې په سیمه کې وسله وال فعالیتونه بیا پیل شول.
پښتون ژغورنې غوځنګ تور پورې کوي چې د وسله والو د بیا راغونډېدو او فعاله کېدو ترشا د پاکستان د امنیتي او جاسوسي ادارو لاس دی خو هغوی دا نه مني.
پولیس او امنیتي چارواکي وايي، وخت په وخت د وسله والو ضد عملیات کوي او هڅه کوي چې د سیمې امنیت ټینګ کړي.
د فېسبوک تبصرې