په شمالي وزیرستان کې تر بارانونو وروسته سېلاوونو د خلکو فصلونو، ځمکو او ودانیو ته زیان رسولی دی.
د سیمې اوسېدونکو مشال راډیو ته وویل، د اګست پر ۱۷مه تر سختو ورښتونو وروسته په ټوچي خوړ کې سېلاو راغی او اوس یې کورونه هم له خطر سره مخامخ دي.
یوه ځايي اوسېدونکي جاوېد خان وویل، د سېلاو له وجې په سربندکي سیمه کې د غلام خان او میرامشا ترمینځ د سړک یوه برخه ړنګه شوې ده. د ده په خبره، له میرامشا څخه د میرلي پورې یوشمېر ابادیو ته زیانونه اوښتي دي او سېلاو په خدي سیمه کې یو پل وړی دی.
د سیمې اوسېدونکو له حکومته وغوښتل چې کرنیزو ځمکو او ودانیو ته دې د تاوان مخنیوي لپاره د ټوچي خوړ دواړو غاړو ته حفاظتي پشتې او استنادي دېوالونه ودروي.
د شمالي وزیرستان ډېپټي کمېشنر شاهد علي خان وايي، انتظامي چارواکي د اوښتو زیانونو په اړه معلومات غونډوي او له اغېزمنو خلکو سره مرستې کوي.
ده زیاته کړه چې د ټوچي خوړ دواړو غاړو ته د حفاظتي دېوالونو پر لګولو به ژر کار پیل شي خو نېټه یې و نه ښوده.
دا په داسې حال کې ده چې د جون له پای راهیسې بارانونو او سېلاوونو د خیبر پښتونخوا د ځینو برخو په ګډون په بلوچستان او سیند کې لوی زیانونه اړولي دي او د پاکستان موسمیاتو ادارې د نورو بارانونو خبرداری ورکړی دی.
بلوچستان او سیند کې د نورو بارانونو اټکل
د موسمیاتو ادارې د اګست پر ۱۷مه وویل چې د سیند او بلوچستان په یوشمېر ضلعو کې به بارانونه د اګست تر ۱۹مې پورې روان وي چې له وجې یې د سېلاوونو امکان دی.
ادارې په بیان کې ویلي دي چې د کراچۍ په ګډون د سیند په یوشمېر نورو سیمو کې د بارانونو ترڅنګ د سخت باد لګېدو امکان هم دی.
همداراز، د بلوچستان په کوټه، لسبېله، ژوب، خضدار، پښین، کلا سیف الله، بوري (لورالايي)، زیارت او ځینو نورو برخو کې هم د سختو ورښتونو اټکل شوی دی.
ادارې په بیان کې له اړوندو ادارو او چارواکو غوښتنه کړې ده چې د خلکو د ځان او مال ساتنې لپاره دې اقدامات وکړي.
په بلوچستان کې د طبیعي پېښو پر وړاندې د مبارزې ادارې (پي ډي اېم اې) د اګست پر ۱۶مه وویل چې د وسې او پشکال بارانونو او سېلاوونو له وجې د وژل شویو شمېر ۱۹۶ ته رسېدلی دی.
