د خیبر پښتونخوا په باجوړ کې نامعلومو کسانو یو سرکاري پرايمري سکول ړنګ کړی دی.
په باجوړ کې د لوی ماموندو تحصیل د تعلیم څانګې مرستیال مشر (اسسټنټ ايجوکيشن افسر) حاجي نذير ملاخېل د نومبر پر ۲۰ مه، مشال راډيو ته وویل چې نامعلومو کسانو په لغړۍ سیمه کې د ښوونځي تر ړنګولو وروسته له ودانۍ د اوسپنې ګارډرې او پټۍ وړې دي.
ملاخېل وویل چې د سکول هغه ودانۍ په تېر وخت کې د امنیتي ځواکونو په استعمال کې وه خو په سیمه کې د امنیت تر قایمېدو وروسته د تعلیم څانګې ته سپارل شوې وه.
د هغه په وینا په سکول کې له ۴۰۰ څخه تر۵۰۰ ماشومانو زدکړې کولې. نوموړي زیاته کړه چې د پېښې رپورټ یې له پولیسو سره لیکلی دی.
په تېرو وختونو کې په باجوړ کې وسلوالو تر ۱۰۰ زيات سکولونه الوزولي ول او د هغو زیاتره پېښو ذمه واري تحريک طالبان پاکستان منله خو د بيګانۍ پيښې ذمه واري تر اوسه چا نه ده منلې.
