په کراچۍ کې عوامي نېشنل ګوند او متحده قومي موومېنټ پاکستان پر ځينو انتخابي حلقو اتحاد کړی دی.
د متحده قامي موومېنټ پاکستان مرستیال مشر مصطفا کمال او د عوامي نیشنل ګوند د سيند صوبې مشر شاهي سيد د فبرورۍ پر څلورمه په مردان هاوس کې تر مذاکراتو وروسته خبرې کنفرانس ته وويل چې دوی به پر ځینو حلقو د يو بل حمایت کوي.
مصطفی کمال وويل چې د لانډهي سيمې پر ۸۸ مې حلقې به دوی د عوامي نیشنل پارټۍ او شاهي سيد بیا وويل چې دوی د کراچۍ پر دوو قامي او د صوبايي اسمبلۍ پر درې څوکيو خپل کانديدان د اېم کېو اېم پاکستان د اميدورانو په حق کې کښېنولي دي.
پخوا د اې اېن پي او د الطاف حسين په مشرۍ د اېم کيو اېم چې مصطفی کمال يې هم برخه وو، پر يو بل د غړو او پلويانو د وژلو تورونه پورې کړي ول خو د فبرورۍ د خبرې کنفرانس پر مهال د اې اېن پي د سيند صوبې جنرل سيکرېټري يونس بونيري مشال راډیو ته وويل چې هڅه کوي چې په کراچۍ کې پښتانه او اردو ژبي په پرامنه توګه سره واوسي.
په تېرو وختونو کې د یو سازش د لاندې پښتانه او اردو ژبه ویونکي (مهاجر) د یو بل سره جنګول شوي دي خو اوس د تل لپاره دغه لارې بندويمصطفا کمال
بونیري وویل "زموږ بنیادي مقصد دا دی چې د ۱۹۸۵ز کال وړاندې چې د ښار کوم ماحول وو، هغه بیا جوړ شي. پښتانه او اردو ويوونکي د وروڼو په شان پرامنه ژوند تېر کړي لکه څنګه چې پخوا تېرېدو. په دې ښار کې نفرتونه ختم شي."
د اېم کیو اېم مرستیال مشر مصطفا کمال وويل، د خپل راتلونکي نسل د ښه ژوند، د ښار امنيت او د ولس په مینځ کې د میني او محبت پیدا کولو لپاره مردان هاوس ته ورغلی دی.
هغه وویل چې په تېرو وختونو کې د یو سازش له مخې پښتانه او اردو ژبه ویونکي (مهاجر) له یو بل سره جنګول شوي دي خو دوی د تل لپاره دغه لارې بندوي او نور به په کراچۍ او ټول سیند کې پښتانه او اردو ژبه ویونکي له یو بل سره په شر نه شي.
ټاکل شوې ده چې په پاکستان کې د فبرورۍ پر اتمه ټولټاکنې وشي. عوامي نیشنل ګوند او ځینې نور ملتپال کراچۍ ښار د پښتنو تر ټولو لوی ښار ګڼي. همدې ته په کتو په کراچۍ کې زیاتره سياسي ګوندونو د پښتنو ابادۍ ته په پام پر ځينو څوکيو يو شمېر پښتانه کانديدان درولي دي.
پاکستان تحريک انصاف چې د ۲۰۱۸ز کال په ټاکنو کې یې له کراچۍ ښاره د قامي اسمبلۍ پینځه او د صوبایي اسمبلۍ درې څوکۍ ګټلې وې، دا ځل یې له کراچۍ ښاره د قامي او صوبایي اسمبلیو لپاره ۱۲ پښتنانه کاندیدان کړي دي.
په تېر ځل انتخاباتو کې د پاکستان پیپلز ګوند په ټکټ دوه پښتانه اغا رفیع الله او قادر خان مندوخېل له کراچۍ قامي اسمبلۍ ته منتخب شوي ول.
اېم کیو اېم د قامي اسمبلۍ پر۲۳۵ حلقه پښتون محمد اقبال مسيد کاندید کړی دی.
دا راز جماعت اسلامي هم د قومي او صوبايې اسمبلۍ په ځینې څوکیو پښتانه کانديدان کړي دي.
اې اېن پي- قامي وطن پارټۍ اتحاد
هلته د خيبر پښتونخوا په چارسده کې قامي وطن پارټۍ او عوامي نېشنل ګوند د قامي اسمبلۍ پر دوو حلقو انتخابي اتحاد کړی دی.
د فبرورۍ پر څلورمه په چارسده کې د اې اېن پي د خيبر پښتونخوا مشر ايمل ولي خان او قامي وطن پارټۍ مشر افتاب احمد خان شېرپاو د خبرې غونډې پر مهال د دې اتحاد اعلان وکړ.
د فیصلې تر مخې پر اېن اې ۲۴ ولاړ د عوامي نېشنل ګوند امیدوار افتاب عالم به د افتاب احمد خان شېرپاو او پر اېن اې ۲۵ به د قامي وطن پارټۍ امېدوار قیصر جمال د ایمل ولي خان په حق کې کښېني.
