د خيبر پښتونخوا د خیبر ضلعې په بره باړه کې يوې بمي چاودنې د پاکستان د سرحدي ځواک يا ایف سي لږ تر لږه ۱۵ سرتېري ژوبل کړي دي.
په خیبر کې د ملېشه ځواک یو چارواکي د نوم نه ښوولو په شرط مشال راډيو ته ويلي چې د اپرېل پر ۲۴مه د اېف سي د ۱۰۶ کنډک پر قافله د سړک پر غاړه ښخ کړل شوي بارودي مواد وچاودېدل.
نوموړي زياته کړه چې د سرحدي ځواک غړو په باړه کې ګزمه کوله چې چاودنه ورباندې وشوه.
د یاد چارواکي په وینا، ژوبل شرتېري د درملنې لپاره روغتون ته رسول شوي دی.
تر اوسه چا د هغه بمي بريد ذمه واري نه ده منلې.
دا په داسې حال کې ده چې په بره باړه او د تیرا میدان په ليرې پرتو سیمو کې له تېرو شاوخوا درو میاشتو راهیسې د پاکستان پوځ د وسلوالو پر ضد عملیات روان کړي دي.
په وروستيو کې د خيبر پښتونخوا په بېلا بېلو سيمو کې د پاکستان پر امنيتي سرتېرو وسلوال بريدونه زيات شوي دي. بلخوا امنيتي سرتېري هم ادعا کوي چې د وسلوالو پرضد يې د عملياتو پر مهال د هغوی پټنځايونه په نخښه کړي او مرګژوبله يې ورته اړولې ده.
په خيبر پښتونخوا کې له روانې ناامني پرضد ولسونو پراخې مظاهرې، جلسې او جرګې هم کړې دي.
بل خوا د پاکستان حکومت او پوځ وايي چې د ترهګرۍ ختمولو ته ژمن دي او د دې لپاره یې د وسلوالو پرضد هدفي عملیاتو ته دوام ورکړی دی.
