د خیبر پښتونخوا په باجوړ کې د پولیسو پر ګاډي په چاودنه کې درې پولیس سرتېري ژوبل شوي دي.
د باجوړ د پولیسو ویاند محمد اسرار مشال راډیو ته په استولي پیغام کې ویلي دي چې چاودنه د سېپټېمبر پر ۲۸ د عنایت کلي سره نېږدې په بای چینه سیمه کې هغه مهال وشوه چې د پولیسو ګاډی له هغه ځایه تېرېده. په پېښه کې یو سب انسپکټر دلاور خان او دوه سپایان ټپیان شوي دي.
چارواکي وایي، ژوبل کسان یې د خار روغتون ته درملنې لپاره وړي دي.
د برید ذمه واري چا نه ده منلې.
د سېپټېمبر پر ۲۷ هم د لوی سم په ډیلي کلي کې کې د وسلوالو په ډزو یو پولیس سرتېرې وژل شوی او دوه ملکیان ژوبل شوي ول.
په باجوړ کې تر دې مخکې هم پر پولیسو او ځایي مشرانو بریدونه شوي دي. د سېپټېمبر پر ۱۱مه په ملا سیدګي سیمه کې یو بل پولیس سرتېری وژل شوی وو چې د هغې وروسته د سیمې پولیسو احتجاجي ناسته پیل کړې وه او د هغه په وژنه کې یې د ککړو کسانو د نیولو غوښتنه کوله.
له یوې مودې راهیسې په باجوړ او د خیبر پښتونخوا په نورو سیمو کې پر پولیسو بریدونه زیات شوي چې پکې یوشمېر سرتېرو ته مرګژوبله اوښتې ده. پولیسو پر سرتېرو د بریدونو ضد په بنو او لکي مروتو کې لاریونونه او احتجاج ناستې کړې وې.
