په خيبر کې د یوه کس تر وژنې وروسته پیل شوی پرلت له امنیتي چارواکو سره تر خبرو اترو وروسته ختم شوی دی.
د خیبر سیاسي اتحاد مشرانو او ځايي پارلماني استازیو د فبرورۍ پر پنځمه ناوخته مشال راډیو ته وویل چې له انتظامي او امنیتي ځواکونو چارواکو سره تر بریالیو خبرو اترو وروسته یې احتجاج پای ته رسولی دی.
دوی وویل چې د وژل شوي ۲۵ کلن بلال اپرېدي مړی د خیبر درې له لارې پورته کړل شوی او خپل کلي بر قمبر خیلو ته وړل شوی دی.
د احتجاجي پرلت یوه مشر او د قومي اسمبلۍ یو پخوني غړي اقبال اپرېدي وویل چې د مذاکراتو پر وخت ریاستي ادارو خپله غطلي تسلیم کړې او د دوی غوښتنې یې منلې دي.
د ده په وینا، د خیبر سرکاري چارواکو د بلال اپرېدي کورنۍ ته د ۳۰ لاکو روپیو ورکول منظور کړي او د فرورۍ پر اوومه به د هغه کور ته ننواتي ورځي. ځايي مشرانو ویلي چې پرلت یې د وژل شوي بلال اپرېدي د کورنۍ په غوښتنه ختم کړی دی.
يو شمېر ځايي اوسېدونکيو د فبرورۍ پر پینځمه ترهغې وروسته پرلت پیل کړ چې کله د دوی په وينا، امنيتي ځواکونو يو ځايي کس په ډزو وواژه.
د سیمې اوسېدونکيو تور پورې کړی وو چې د باړې اوسېدونکی بلال اپرېدی د فبرورۍ پر پینځمه د پولیسو او امنیتي ځواکونو په ډزو کې وژل شوی دی.
د خیبر ضلعې د پولیسو یوه چارواکي چې له رسنیو سره یې د خبرو اجازه نه لرله، د نوم نه ښوولو په شرط مشال راډیو ته وویل، د فبرورۍ پر پینځمه غرمه مهال امنیتي ځواکونو او پولیسو د جمرود پر تخته بېګ پوستې یوه ګاډي ته د درېدو اشاره وکړه خو هغه و نه درېد.
دی وايي، د ګاډي د نه درېدو په غبرګون کې سرتېرو ورباندې ډزې وکړې چې پکې په غلطۍ یو لاروی بلال اپرېدی ولګېد.
د پولیسو چارواکی زیاتوي چې په ګاډي کې دوه کسان ناست ول او په تېښته کې بریالي شول، خو اپرېدی ووژل شو.
د سیمې اوسېدونکي وايي چې اپرېدی د باړې د بر قمبرخېلو اوسېدونکی وو چې د پېښور په رېګي ماډل ټاون کې به یې د شپې مزدوري کوله. د دوی په خبره، نوموړی له کاره کور ته پر لاره وو چې د پېښې ښکار شو.
د هغه تر وژنې وروسته د سیمې اوسېدونکو او فعالانو د اپرېدي مړی په جمرود کې د خیبر درې پر لاره ایښی دی او غوښتنه کوي چې لومړی دې امنیتي ځواکونه د هغه وژنه تایید کړي او بیا دې د خیبر د پولیسو مشر او نور لوړپوړي چارواکي له مظاهرچیانو سره خبرې وکړي.
د پښتون ژغورنې غورځنګ مشر منظور پښتین هم سره له خپلو ګڼ شمېر ملګرو په دې پرلت کې د ګډون لپاره هلته ورغلی وو.
دا پېښه په داسې حال کې شوې ده چې په وروستیو کې د تخته بېګ پر پوستې په وسلوال برید کې پولیسو ته مرګژوبله واوښته.
د جنورۍ ۱۹مې په حمله کې دوه پولیس ووژل شول او د پوستې ودانۍ ته زیان واوښت. تحریک طالبان پاکستان د حملې ذمه واري منلې وه.
