د خیبر پښتونخوا چارواکي په بنو کې وسله والو پر پولیسو برید کړی او په لکي مروت کې د پاکستان امنيتي ځواکونو يو ډرون حمله کړې ده.
د بنو د پولیسو ویاند حنظ الله د جون پر ۲۶مه رسنيوو ته په لېږلي بیان کې وويل چې نامعلومو وسله والو د کېنټ تاڼې په حدودو کې د ترهګرۍ ضد پولیسو پر يو افسر زبیر خان ډزې وکړي او هغه یې وواژه. د حنظ الله په وينا وسله وال تښتېدلي دي.
د بنو پولیسو همداراز ويلي چې وسله والو د پولیسو پر ګزمې هم په سړک کې ښخ کړی بم چوولی دی. د پولیسو په وينا په دې برید کې درې ولسي وګړي ژوبل شوي دي. تر اوسه کومې وسله والې ډلې په دې اړه څه نه دي ويلي.
بلخوا په لکي مروت کې پوځي او استخباراتي چارواکو مشال راډیو سره په خبرو کې ادعا کړې ده چې د جون پر ۲۵مه، د پاکستان پوځ په يو ډرون برید کې ۳ مشکوک وسله وال وژلي دي. دوی د نومونو پټ ساتلو په شرط مشال راډیو ته وويل چې دا ډرون حمله د سرې درګې په پيرپل کې شوې ده.
چارواکو په دې برید کې د وژل شويو کسانو تعلق له حافظ ګل بهادر وسله والې ډلې سره ښوولی دی. تر اوسه دغې ډلې په دې اړه څه نه دي ويلي.
د جون په اوومه هم د شمالي وزیرستان په میرلي کې استخباراتي او پوځي سرچینو ادعا کړې وه چې درې وسله وال په يو ډرون برید کې وژل شوي وو. خو وروسته د پاکستان د پوځ مطبوعاتي څانګې په يو رسمي بیان کې وويل چې هغه برید د ډرون نه بلکې د پاکستان د پوځ د توپچي چورلکو یا ګن شپ هیلي کاپټرو کړی وو.
دا په داسې حال کې ده چې د پاکستان حکومت د جون پر ۲۳مه اعلان وکړ چې په ټول ملک کې به د ترهګرۍ ضد پوځي عمليات پيلوي. ګڼو سیاسي ګوندونو د دې عملياتو مخالفت کړی دی. عوامي نېشنل ګوند او تحريک انصاف ويلي چې د پاکستاني پوځ پخوانيوو عملياتو او مخکنيوو تجربو ته په کتلو له دې عملياتو د بهترۍ اميد نه لري.
د پاکستان پوځ له ۲۰۰۲ کال راهیسې څو ځلې په قبايلي سيمو کې پوځي عمليات کړي دي. د دې عملياتو او وسلوالو سره د نښتو له وجې په لکونو خلک بې کوره شوي دي. که څه هم پوځ ويلي چې په دغو عملياتو کې یې ګڼ وسلوال وژلي خو اوسمهال د خیبرپښتونخوا بېلابېلو سیمو قومي مشرانو د جرګو او جلسو له لارې حکومت ته خبرداری ورکړی چې وسلوالو بیا فعاليتونه پيل کړي دي.
