اوکرایني ولسمشر وولودیمیر زېلېنسکي د دولتي ساتونکو د خدماتو ادارې مشر سېرهې (سېرګې هم بلل کېږي) رود له دندې ګوښه کړی دی.
زېلېنسکي دا ګام تر هغې دوه ورځې وروسته واخیست چې د دولتي ساتونکو دوه غړي د ولسمشر د وژنې په دسیسې (منصوبې یا سازش) جوړولو تورن شول.
ولسمشر زېلېنسکي د مې پر نهمه په یو امر کې د دولتي ګارډز یا ساتونکو ادارې مشر رود ګوښه کړ خو لا یې د هغه ځایناستی نه دی نومولی.
دا په داسې حال کې ده چې روانه اوونۍ د اوکراین د دولتي امنیتي خدماتو په نوم استخباراتي ادارې ویلي ول چې د دولتي ساتونکو د خدماتو ادارې دوه کرنلان د زېلېنسکي او د ځینو نورو لوړپوړو چارواکو د وژلو د پلان جوړولو په تور نیولي دي.
ادارې ویلي چې هغه کسان د روسیې د امنیتي خدماتو وفاقي ادارې په نوم استخباراتو ګومارلې ول، چې مسکو ته به یې پټ معلومات هم ورکول.
مسکو لا د اوکراینیو چارواکو د څرګندونو په غبرګون کې څه نه دي ويلي.
د دولتي ساتونکو د خدماتو اداره د اوکرایني ولسمشر تر واک او د پارلېمان تر نظارت لاندې اداره ده چې دنده یې د لوړپوړو حکومتي او دولتي چارواکو او د هغوی د کورنیو د غړو امنیت ساتل دي.
